Matchbericht FCB - FC Täuffelen 1:2

Der FCB geht bereits früh durch Luca Lauper in Führung und vergibt in der Nachspielzeit einen möglichen Punktgewinn und steigt in die 4. Liga ab.

Sonntag, 18. Mai 2025, 10:30 Uhr, Fussballplatz Lachen Büren an der Aare

Meisterschaft 3. Liga, Gruppe 4

Aufstellung

Julian von Heydebrand, Ruben Dos Santos, Manuel Bigler, Fabian Hänzi, Nick Eggenberger (70' Joel Tüscher), Men Meier, Denis Schneider, Mario Bärtschi (52' Numa Marmier), Dario Leisi (80' Remo von Wartburg), Luca Lauper (61' Yannic Kubacki), Fabian Schuler

Ersatz

Tim Blatter, Marco Günther (angeschlagen)

Abwesend

Manuel Scheidegger, David Vuilleumier, Alex Jorge Files, Joel Knörr, Jascha Kubacki, Stefan Pranjic

Staff

Patrick Meier (Trainer), Thomas Lerch (Assistenztrainer), Reto Steiner (Masseur)

Tore

06' 1:0 Luca Lauper auf Pass von Dario Leisi

45'+1' 1:1 Perez Fries

90'+3' 1:2 Michael Zingg

Karten

49' Ruben Dos Santos

75' Denis Schneider

Bemerkungen

Spiel der letzten Hoffnung für den FCB. Im Falle einer Niederlage ist der Abstieg besiegelt.

Der FCB führte Freitag, Samstag und Sonntag das traditionelle Fischessen durch. Der FCB dankt allen Besuchern für die Unterstützung.

Spielbericht

Erschti Haubzyt

Für einisch hets dr FCB y dr Startphase richtig guet gmacht. E flüssig vortreite Aagriff chunnt zum Dario Leisi, är louft es paar Meter und schpiut tupfgenau uf e haubrechts yneloufend Luca Lauper. Genauso hey mir das gärn, so sy mir üs das gwöhnt, wie dr Luca abschliesst, das wey mir gseh. Nid lang fackle und bumm, versorget y länger Egge. 1:0 für e FCB, e Start nach Mass und es Zeiche – dr FCB läbt (6. Minute). Das lot sich dr FC Täuffelen nid lo gfaue und findet langsam dr Tritt. 14. Minute, dr Julian von Heydebrand isch parat und blockiert e Schuss vom Gägner souverän. Het sich jitz dr FCB e Uszyt gno? Nid? Aber das chunnt eim scho chley derno vor, plötzlech het dr Gägner mee vom Schpiu und isch gäng e Schritt schnäuer. Passet uf Giele, so chunnt das nid guet! Und gopfridstutz bau häts kachelet, guet hey mir vor em Schpiu no chley d'Latte gäg abe schüstiert, so brätschts am Metau und düre isch die Grosschangse für e Gascht. Das sy jitz Chnuschticheibe, lot me die Töiffeler eifach lo düremarschiere, Schuss – uff, dä Cheib isch dernäbe. Dr FCB merkt jitz säuber, dass das so nid cha wytergo. Me lot sich nümme so wyt y d'Verteidigung lo zruggdränge, gryfft früecher a und lueg do, es funktioniert. D'Baueroberig wird aber grad wieder dür ne Fäupass zunichte gmacht. Y dr 25. Minute maches üser Giele besser. E Baustafette mit de Aktöre Men Meier, Luca Lauper und Fabian Schuler kreiert e guet Changse, sie wird aber leider verbüchslet. Churz drufabe schteit dr Fabian Schuler y ussichtsriicher Position, "schiess doch Fäbu, nid lang umeblööterle, hou das Ding yne!" Dr Fäbu het ke Zyt uf üs Besserwüsser z'lose und schpiut no e Pass, e Pass is Niemandsland.

Trinkpouse

Es isch jo nid so verruckt heiss, aber dr Schiri, vom ne verruckte Yloufe uf em Damm obe (!) dänk scho uf de Wegge, het Zunge bei Fuss und muess umsverrecke es Ufboupräparat yfreese. Es geit wyter und früsch gschtercht chunnt Büre zum ne verheissigsvoue Freischtoss. Wär aber scho no guet, wenn de dä wenigschtens y d'Nöchi vom Gou chiem. E richtige Schöggeler-Schutt. Plötzlech het dr FCB wieder e schwache Momänt. Konfus chönnt me aus Adjektiv durchus verwände, entgeischteret statt begeischternd geit ou, oder eifach im Züg umegfätterle. Item, Täuffelen het das realisiert und git Gas, Vougas. Sie chöme zu vier Corner hingerenang, bringes aber nid fertig, d'Verteidigung vo Büre usztrüggle. Die nöii, schöni Matschuhr zeigt die 39. Minute und dr Julian von Heydebrand cha zeige, wie läng das är isch, dr Bau geit näbem Pfoschte y Corner. Die räschtleche Minute glyche am ne müede Kick und es schynt, dass beid Mannschafte mit em Zeigte nid uf Chriegsfuess schtöö. Do hey mir aber d'Rächnig ohni Täuffelen gmacht. 45'+1' – 1:1. Immer wieder churz vor dr Pouse, oder churz vor em Ändi kassiert dr FCB e Yschlag. Anschtatt mit em ne beruhigende Vorsprung y Garderobe go es feins Teeli schlürfle, muess me wieder d'Gedanke büschele und mit em ne unzfrydne Gring ir Kabine go Predigt lose.

 Zwöiti Haubzyt

Ds Schpiu isch wieder aapfiffe und dr FCT schtürmt ufs Büre Gou los. Jo heilandsack, bringt dä dä Bau nid is lääre Gou. Jitz hey mir aber ghörigs Schwein gha, het dä syni Schue dr verchert Wäg aagleit? Es Novum y dr 49. Minute – dr Ruben dos Santos überchunnt die gäubi Charte und uf em Bänkli bim FCB lüpfe sech diversi Füdle zum Yloufe. Schliesslech chunnt y dr 52. Minute dr Numa Marmier für e Mario Bärtschi. D'Begägnig isch im Momänt weni amüsant und hingerlot dr Ydruck: "Wüsse die zwöi Team, um was es überhoupt geit?" D'Schpiu isch prägt vo Fäupäss und Zwöikämpf im Mittufäud. E wytere Wächsu bim FCB zeichnet sich ab. Für e Luca Lauper wächslet dr Patrick Meier dr Yannic Kubacki y dr 61. Minute y. Ohni fräch z'wärde wage ig e Ussag. In Anbetracht, dass Büre muess gwinne, hät sich e Doppuspitze Lauper/Kubacki nid so schlächt gmacht. Bsunders ou, wüu dr Luca zeigt het, dass är's druffe het. Wenn y d'Spitze weni und ungnaui oder schwär verarbeitbari Bäu gschpiut wärde, gseht e Mittustürmer haut nid guet us und isch dämentsprächend ineffizient. Fertig nörgele! 70. Minute: "Trinkpouse!" Nid scho wieder. E wytere Wächsu isch aagseit. Dr Joel Tüscher chunnt für e Nick Eggenberger uf e Bitz. Schpiufluss chunnt eifach nümme uf. Dr Unterhautigswärt vom Schpiu glycht däme vom no ESC-Event. Längwylig und sehr ermüedend. Wyteri 10 Minute vom Schpiu schpuelets ab und dr nöchscht Wächsu schteit vor dr Tür. Dr Remo von Wartburg nimmt im Sturm für e Dario Leisi Ufschtellig. Büre schaffts chum mee y Abschluss z'cho und Täuffelen bemüeht sich, ds Unentschiede z'verteidige. Bi däm Schpiustand isch nämlech Büre abgschtiege und Täuffelen logischerwys grettet. 89. Minute, dr Julian von Heydebrand isch wieder im Fokus und cha sich mit zwe Glanzparade uszeichne. Es isch bezeichnend, dass dr Gascht wieder y de Plusminute zuegschlage het. 90'+3' – 1:2 dür e Michael Zingg. Dr nöchscht Abschtieg nach dr Saison 2021/22 isch Tatsach.

Fazit

Das faut eim unheimlich schwär und wyteri Wort z'verlüüre isch im Momänt fäu am Platz. Näme mir no die drüü letschte Schpiu und mache ds Beschte drus.

Nöchschts Wuchenänd:

Samschtig, 24.05.2025, 19:00, FC Grünstern – FCB, Gemeindesportplatz Ipsach

Bitte ds Münz für d'Parkuhr nid vergässe!

Hopp FCB