top of page

Gfröits, Erwartets, e Überraschig und e Normauzueschtand (mit Fotos und ere wichtige Korrektur)

Aktualisiert: 27. Mai

Fotos vom Schpiu Team Häftli Jun. B und vom Eis in Orpund vom Stephan Kubacki


Gfröits

Team Häftli Jun. D – FC Biel-Bienne Academy E-11 6:3 (2:3 / 6:3)

Trotz schpielerischer Überlägeheit vo de Gäscht us Biu, hey d'Juniore vom Joel Tüscher und em Peter Heiniger ds Schpiu chönne chehre. Dr Noah Elias Ndeye het sich y däm Schpiu aus drüfache Torschütz Beschtnote abghout. Mit däm Sieg sy sie mit 7 Punkt us 8 Schpiu im Mittufäud platziert.

 

Erwartets

FC Orpund – FCB 3. Liga 5:0

Ohni die Gäubgschperrte Luca Lauper und Ruben Dos Santos het der FCB y dr 3. Liga ke Chance gäge dr gross Ufschtiegsfavorit us Orpund und verlüürt diskussionslos 5:0 (1:0). Ungloublech derby, dass me im uswäglose Schpiu wieder drei gäubi Charte kassiert (Nick Eggenberger, Fabian Schuler und Diego Imperiali). Damit het dr FCB die truurige Rekordmarge vo 100 Schtrofpunkt übertroffe und isch im Bösebueberanking nümme yzhole. Dr Diego isch i däm Fau gäge FC Nidau gschperrt.

Mee zur Situation vom Eis, chame de ir MatchZytig gäge ändi Wuche läse.




 

E Überraschig

Team Häftli Jun. B 2. Stärkeklasse – FC Breitenrain c 2:0 (2:0)

E sackstarchi Mannschaftsleischtig, vorauem y kämpferischer Hinsicht bringt ds Team vom Manuel Scheidegger und em Marcello Cucuzza wieder is Gschäft um ne mügleche Ufschtieg. Troffe hey dr David Vuilleumier und dr Luca Arn. Ds nöchschte Schpiu isch uswärts gäge Huttwil und, sofern me dä Match cha gwinne, chunnts e Wuche druf in Büre zum aues entscheidende Schpiu gäge gägewärtig Leader FC Schüpfen. D'Situation vor erschte Mannschaft lot leider nid zue, dass d'Trainer uf aui Schpieler chöi zeue (Tim Blatter, Joel Knörr, Mario Bärtschi). Trotzdäm chame hoffe, dass sie das mit ihrer professionelle Yschtellig und effiziänte Schpiuart packe. Mir sy uf au Fäu flyssig am Dume drücke.


Korrektur

Ds erschte Gou het dr Nils Blatter gmacht und ds Zwöite dr David Vuilleumier. Merci Marie-Anne, ig ha eifach übernoo,was dr Schiri uf sy Zettu kriblet het.



 

Normauzueschtand

Team Häftli Jun. C Promotion  - SC Thörishaus 6:1 (1:1)

Normauzueschtand heisst, die chöi eifach fasch nid verlüüre. Usser gäge Köniz het dr Ufschtieger Team Häftli aui Schpiu gwunne und isch punkteglych mit em FC Köniz a dr Tabäueschpitze z'gfinge. Das isch jo sensationell! Die letschte drü Schpiu in Muri, deheime gäge Oberemmental 05 (FC Trubschachen) und uswärts in Bümpliz. Muri uf em 4 Platz isch 5 Punkt hinger Team Häftli, Oberemmental mit 6 Punkt kämpfe no gäge Abschtieg und Bümpliz isch eigentlech nach Verluschtpunkt y dere Gruppe, mit eim migerige Pünktli uf em erscht Platz. Das isch es happigs Räschtprogramm. Mir drücke Düme.


Schpiumorge Junioren E und F

Lachen Büren an der Aare (ausnahmsweise auf dem Trainingsplatz)

Teams: Team Häftli (Büren a. Aare) a, SC Aegerten Brügg a, SC Aegerten Brügg b, FC Grünstern a

Schpiuplatzvorbereiter und Schpiuleiter: Mark Rüttimann, unterschtützt vom Simon Gobat


Giessacker - Hauptplatz, Safnern

Teams: FC Schnottwil-Limpachtal, Team Häftli (Büren a. Aare) a1, Team Häftli (Büren a. Aare) a2, FC Madretsch a2, FC Madretsch a1, FC Schüpfen c, FC Azzurri Bienne c1, SV Lyss d, Team Häftli (Safnern) c, FC Azzurri Bienne c2


D'Trainer Sergio Lopes (Junioren E) und Mikael Stauffer / Luka Skvorc (Junioren F) chöi über positivi Resultat brichte. Es isch gäng e Fröid zuezluege, mit wie viu Begeischterig und Fröid Schutte cha betriebe wärde.


Budi

Aktuelle Beiträge

Alle ansehen

1 Comment

Rated 0 out of 5 stars.
No ratings yet

Add a rating

Vo mehrere Syte ha ig chönne vernä, dass üse Gooli, dr Tim Blatter e sensationelli Leischtig abglieferet het und e super Rückhaut isch gsy für üsi Mannschaft. Einisch mee, darf me söge. Tim, es isch ydrücklech, wie du mit er e Säubschtverschtändlechkeit is Gou gschtange bisch und mit hervorragende Leischtige Wuchenänd für Wuchenänd ufwartisch. Merci Tim, grosses Kino!

Zuer Erkärig: ig bi nid am Match gsy.

Budi

Like