FCB - SC Rüti b. Büren 1:0 (1:0)

E farblosi Vorschtellig

FC Büren an der Aare: Simon Käser, Eric Stauffer (70. Reto Grogg)l, Ruben Dos Santos, David Schläfli, Manuel Scheidegger, Denis Schneider (46. Luc Gutbub), Thomas Lerch (C), Yannik Tüscher (46. Nick Eggenberger), Men Meier (60. Joel Tüscher), Fabian Schuler (88. Raphael Schuler), Yannic Kubacki (64. Luca Lauper) Ersatz: Mikael Stauffer (ET)

Gou: 7. 1:0 Ruben Dos Santos (Penauti)

Gäubi Charte: Thomas Lerch, Men Meier, David Schläfli

Nid im Isatz: Lars Freiburghaus (zwöiti Mannschaft), Mischa Hofer (zwöiti Mannschaft), Marco Günther (Militär), Diego Imperiali (zwöiti Mannschaft u Gouschütz), Reto Rüttimann (Ferie), Dario Leisi (zwöiti Mannschaft)

Es farbloses Schpiu

Wenn für dä Matsch es Prädikat suechsch wo passt, de chunnt eim schpontan farblos, glanzlos, fad oder schüsch was bluetläärs i Sinn. Aber dä Uftritt het durchus ou öppis Positivs, nämlech wichtigi drü Punkt. Voila – u das isch cheibe wichtig u schliesslech ou z'einzige wo zeut. Nach paar Tag frogt kene me, wie das z'schtang cho isch u wie gnietig das ganz Unterfange gsi isch. Zur Verteidigung vo üser Egippe muess ou gseit si, dass die Derby immer unger em ne schpezielle Schtärn schtöh und e Eigedynamik entwickle, wo di chum chasch wehre drgäge und beiflusse ersch rächt nid.

Aber eis nach em angere. E wunderschöne Septämbertag, e Platz wo d'Finger läcksch (Jarno sei Dank) und e Gulisse wo dr Kassier vor Verzückig fasch düredräit. U z'Tüpfli uf em i, e scharmanti Bedienig i dr Büvette und ändlech wider einisch es feins Schtück Chueche! Merci Froue! Was wotsch no meh?

Dr Penauti

Erschti Haubzyt – geils Wätter!

Büre isch rächt überzügend a die Ufgabe häre gange u het üs ds Gfüeu vermittlet, dass sie wüsse wie wichtig die drü Punkt wäre. Bereits ir vierte Minute chöpflet dr Yannic Kubacki us gueter Position übers Gou. Churz drufabe dr erscht und letscht Höhepunkt. Eine vo üsne Schtürmer (e Schand, ig weiss nümme wär) wird läng agschpiut, zieht i Sächzähner ine und wird vom ungeschtüme Goli vo Rüti vo de Socke ghout, e glasklare Penauti, entschprächend ou dr Pfiff vom Schiri. Dr Ruben Dos Santos zeigt einisch meh, wie wichtig är für die Mannschaft isch. Är rumt nid nume hinge ab, är übernimmt ou Verantwortig. Mit vouer Überzügig nimmt är dä Bau und hout ne furztroche i d'Masche (7. Minute). Wär jitz dänkt het, das sig e Signauwürkig zum ne interessante und umkämpfte Schpiu gsi, dä irrt. Umkämpft jo, interessant nume i der Hinsicht, cha Rüti reagiere oder Büre gar ds Resultat usboue? Paar Minute schpöter het Rüti e gueti Glägeheit zum Usglich, dr Schuss landet aber näbem Gou. Praktisch im Gägeagriff chunnts zum ne Corner für Büre. Dr Fabian Schuler schrittet zur Tat und verwütscht bim ne Hoor dr Goli mit sim Versuech, ne diräkt z'verwandle. Es fougt e längere Abschnitt, wo üs Zueschouer nid us de Socke hout. Das git eim chlei Zyt, mit de zaurich ufmarschierte Rütiger es Schwätzli z'ha und i Erinnerige z'schwelge. Ke Mannschaft bringts fertig, gschtauterischi Akzänte z'setze, verschwiege de no über mehreri Schtatione am Bau z'blibe. Zerfahre gsehts us, es Schpiu prägt vo Fäupäss und ideelose Bemühige i Matsch z'gfinge, wouverschtange hüben wie drüben. Tristesse pur! Mir schriebe die 23. Minute, churz hurti ufrege, wüu e Nachschuss vom ne Freischtoss us zwe Meter vom Simon Käser mirakulös pariert wird. Nächhär isch wider fertig luschtig, mi lot sich wider im aute Fahrwasser lo triebe, gfingt dä Rank eifach nid. Ir 36. Minute gseht dr Manuel Scheidegger si Schuss vom Goli blockiert, es wär eigentlech no e gueti Chance zur Resultatkosmetik gsi. Die Haubzyt wird mit er e gäube Charte für e Thomas Lerch und für e Men Meier usglütet. Wenn ig die Ziele ufe bis zur Überschrift aluege, isch das es dürftigs Fazit, aber wägerli es chunnt mir nid meh i Sinn z'schriebe. U nume das es chlei nach öppis usgseht, cha ig jo nid eifach es paar Sätz am Füdle abfingerle. Item, mache mir e Abschnitt, überschpringe d'Pouse und fahre mit dr zwöite Haubzyt wyter.

Haut – öppis muess no gseit si.

Im Vorfäud zu däm Derby

Im Vorfäud zum däm Matsch si dr Manuel Scheidegger und dr Yannik Tüscher vo re Grippe gschtrupusset worde. Zuesätzlech hei dr Yannik Tüscher, Joel Tüscher, Fabian Schuler und dr Raphael Schuler, sowie dr Massör Reto Steiner, d'Feriereis i die schöni Toskana um paar entscheidendi Schtunde usegstüdelet, damit sie d'Egippe nid entscheidend schwäche. Und dr Hammer isch, si chöme de ou wider früecher hei aus planet, dass sie de gäge Orpund ou wider uf dr Matte schtöh. Schappoo!

Zwöiti Haubzyt – immer no geils Wätter

I dr Garderobe vo Büre hei vermuetlech d'Chöpf grouchnet. Zfride het me jo ab der Leischtig nid chönne si. D'Foug isch gsi, dass gwüssi Retusche si gmacht worde. So isch für e Denis Schneider (nach em ne Zwöikamp agschlage) und für e Yannik Tüscher dr Nick Eggenberger und dr Luc Gutbub (Prömiere im Eis) zum Isatz cho. Nämers vorab, ou die Massnahme hei nid entscheidend derzue bigschtüret, dass mir besseri Choscht hei uftischet übercho. Aber das isch jo wyter nid verwunderlich, do hätte jo 22 Maa uf däm Platz söue dr Finger… 52. Minute u bau wär die ganzi Herrlechkeit für Büre verby gsi. Wär, dass isch entscheidend, wüu mir einisch meh mit em Simon Käser e reflexschtarche Goli zwüsche de Pfoschte gha hei. Dank ihm schteits gäng no 1:0 u d'Chance uf ne Vouerfoug si immer no intakt. Ir 64. Minute macht dr Yannic Kubacki für e Luca Lauper Platz, dr Luca het nach drü Wuche ärztlicher Pouse ändleche wider i ds Gschehe chönne igriefe. I dr 69. Minute rettet nid dr Simon Käser vor em Usglich, nei für einisch isch es dr Pfoschte wo schüstemang am rächte Ort schteit. Düreschnuufe! Ds Schpiu läbt eigentlech nume no vo dr Schpannig. Schafft Rüti dr mittlerwile fasch verdient Usglich, oder tuet dr FCB dr Dechu truf? Bim ne Freischtoss isch Rüti noch dran, dr Bau isch aber chlei z'höch agsetzt, dr Simon Käser chunnt um ne wyteri Parade ume. Ir 70. Minute wird dr Reto Grogg für e Eric Stauffer igwächslet. Das isch ke Variante für ne Schlussoffensive, e Verteidiger chunnt für ne Verteidiger. D'Schtratege a dr Linie hei konschtatiert, dass me hüt mit aune Mittu muess versueche, dä minimau Vorschprung über d'Runde z'bringe. Harakiri-Methode zur Siegsicherig si bi däm Schpiuverlouf definitiv ke intalligänti Variante. Aber es het du nid viu gfäut, hät Büre ds zwöite Gou no uf z'Reieli brocht. Zerscht schieteret dr Luca Lauper us nöchschter Nöchi und dr Thomas Lerch chöpflet knapp über ds Gou. Aber äbe, knapp drüber isch ou dernäbe. Dr Fabian Schuler machts ir 82. Minute ou nid besser u chlepft us paar Meter übers Gou. Churz vor Schluss gits e wyteri Prömiere, Schuler raus Schuler rein, dr Raphael ersetzt si Brüetsch Fabian. Das isch es de eigentlech ou scho gsi.

Fazit

Bösi Zunge bhoupte, dä Matsch heig ke Sieger verdient. Das ma us Zueschouersicht so schtimme. Über nünzg Minute hei mir ke Finchoscht vorgsetzt übercho, Läckerbisse si cheibe dünn gsäit u Höhpünkt üsserscht rar gsi. Es faut uf, wenn Büre gäge e vermeintlech schwechere Gägner muess schutte, tuet me sech aus Schpiugeschtauter nid grad mit Ruhm bekleckere. Ufgfaue isch usserdäm ou, dass me im Momänt viu zviu Chance brucht, bis es ändlech wider mou bim Gägner ischlot. Und eis, wo mir gäng wider uffaut. We me im Schpiuufbau die länge und höche Bäu aus Zoubermittu wot isetzte, artets fasch chlei zum ne Pingpongschpiu us. Die Bäu si sofort wider i dr Häufti vo Büre u müesse wider verteidiget wärde. Mi erzügt sich so säuber unnötige Druck und Konschtruktivs chunnt säute bis nie derby use.

E wichtigi Ergänzig

I de Matschbrichte oder im Matschprogramm isch öppe d'Red vo de graue Eminänze, de aute Routiniers oder em Trio Infernale (Lerch, Rüttimann, Scheidegger). Simu, es isch so, mit 34i bisch ou du e aute Fuchs, ab sofort bisch ou du derby. Das wird eim gar nid so bewusst, e so schprützig wie du di Wuchenänd für Wuchenänd uf em Schuttplatz präsentiersch.

Nöchschts Wuchenänd

Nöchschts Wuchenänd isch me am Samschtig in Orpund uf Bsuech, Apfiff isch am Vieri. Ig bi überzügt, mir gseh denn es ganz angers Büre.