top of page

FCB - SC Aegerten Brügg 2:3 (1:2)

Meisterschaft 3. Liga, 13. August 2019, 19:00 Uhr, Sportplatz Lachen Büren an der Aare


We me zu däm Saisonschtart ums Verrecke negativi Aschpekte wott sueche, wird me ohni gross go z'nusche fündig. Erschtens isch nid logisch, dass me e so es wichtigs Schpiu zwe Tag nach em ne schwäre Cüpmatsch asetzt. Ou scho nume, wüu dr Gägner zu jeder angere Variante Hand bote het. Zwöitens wär z'erwarte gsi, dass villech usser einer chlyne Retusche, die glichi Schtarteuf ilouft. Ganz eifach, wüu die Mannschschaft guet harmoniert het, schtelligsmässig überzügend as Wärch gange isch und dr kampfbetont Schtiu e Zwöitligischt het chönne beidrucke. E wytere Aschpekt isch, u das Phänomen isch z'Büre längschtens bekannt, dass Wucheschpiu gäng chlei dr Tatsch ahaftet, dass üser Kräcks denn nid glich parat si, wie i de reguläre Mätsch a de Wuchenänd. Das cha mit em Wägjufle vo dr Arbeit z'tüe ha, wo im Chlyhirni die eint oder angeri Schpur hingerlot. Und e wytere Negativpunkt isch sicher Zytschpanne vo 12 Tag, bis zum nächschte Isatz gäge Lecce. Aues zäme nid gueti Vorussetzige für ne optimale Schtart i die Drittligasaison. Ds Ländtifescht lässt grüssen. So fertig nörgele, gschuttet isch jo glich worde.


D'Formation vo Büre:

Simon Käser, Reto Grogg, Ruben Lopes dos Santos, Eric Stauffer, Manuel Scheidegger (C), Nick Eggenberger (30. Thomas Lerch), Yannik Tüscher (60. Men Meier), Reto Rüttimann, Joel Tüscher (46. Denis Schneider), Fabian Schuler, Luca Lauper (81. Yannic Kubacki)


Ersatz: Mikael Stauffer, Mischa Hofer, Lars Freiburghaus


Nid derby:

Marco Günther (Militär), Diego Imperiali (Isatz ir 2. Mannschaft und es Gou gschosse), David Schläfli (immer no uf der Hochzytsreis, dä cha nid gnue übercho), Raphael Schuler (Pass no nid itroffe)


Staff: Patrick Tüscher, Patrick "Vofi" Von Felten (Trainer), Reto Schteiner (Massör)


Gouschütze:

7. 0:1 Dylan Halter, 35. 1:1 Reto Rüttimann (Eggschtoss vom Fabian Schuler), 44. 1:2 Dylan Halter, 79. 2:2 Luca Lauper (uf Pass vom Thomas Lerch), 90.+2 2:3 Nick Allenberg


Bemerkig:

Schpiu wägem Ländtifesch vorverschobe


Eis chame zu däm Schpiu vorusschicke. Längwylig isch es nie gsi, beidi Mannschafte hei mehrmous d'Müglechkeit gha, entscheidendi Träffer z'margiere. Für e Ahang vo Aegerte isch die ganzi Sach liechter z'ertrage gsi, wüu sie gäng wider i Füehrig gange si und am Schluss z'bessere Änd für sich hei gha.


Was isch ir erschte Haubzyt passiert?

Bereits i dr erschte Minute chunnt Aegerte zum erscht Torschuss, aber üse Simu Käser isch uf em Poschte gsi. Ir füfte Minute git ou dr FCB es Läbenszeiche vo sich u toucht nach ere Koproduktion Lauper/Rüttimann vor em Gou uf, dr Schuss vom Reto Rüttimann verfäut aber sis Ziu. Ds Abtaschte isch Gschicht, jitz geits a ds Igmachte. Ir Offensive het Aegerte i dr Defensive vo Büre immer wider für Unrueh gsorgt. Mit gschickte Loufwäge und passende Finte hei sie verschtange, d'Verteidigung vom FCB z'verwirre u si so praktisch unghinderte vor em Gou uftoucht. D'Azeig vo dr imaginäre Matschuhr zeigt die 8. Minute, Aegerte wird i doppleter Hinsicht beschänkt u geit 1:0 i Füehrig. Zum einte louft dä Agriff wie dür Anke, wie obe atönt, u zum angere lot sich üse Goli absolut atüpisch wyt us sim Gou lo use lööke. Dä Träffer z'realisiere isch kes Häxewärch me gsi. Dä früech Gägeträffer het üsi scho chlei zum Hüsli us brocht aber trotzdäm het me dr Gring nid lo hange u het versuecht, z'kontere. Uf ne Pass vom Reto Grogg vergit dr Fabian Schuler e gueti Chance zum Usglich. Dr Goli cha dr nid platzierti Schuss pariere. Ir 13. Minute chunnt Aegerte zum ne Hochkaräter, d'Diräktabnahm zischt aber zu üser Erliechterig knapp übere Chaschte. Es geit hin und här, die guete Momänte sie bis do häre glichmässig verteilet. Es fouge 8 Minute, wo üse FCB verpasst, entscheidendi Akzänte z'setzte. 16. Minute, dr Luca Lauper suecht uf ne Eggbau dr Abschluss. 20. Minute, dr Fabian Schuler knaut e Maasflangge vom Reto Rüttimann übers Gou u vergit so e sogenannti Hunderprozäntigi. I dr 24. Minute isch es wider dr Fabian Schuler wo si Schuss nid mit dr nötige Präzision cha abfüüre. Ir 30. Minute ersetzt dr Thomas Lerch dr glücklos agierend Nick Eggenberger. Är isch eis vo de Opfer vo dr inkonsequente Arbeitswies vo üser Hingermannschaft, mir heis igangs erwähnt. Aegerte isch wider am Drücker, dr Schuss länkt dr Simu Käser i Corner (mir schribe die 35. Minute). Im Gägeagriff erkämpft sich dr Reto Rüttimann e wytere Eggschtoss. Ziugenau chunnt da Corner uf e Fabian Schuler, i sim unverkennbare Schtiu lot är am Goli ke Chance u schiesst zum verdiente 1:1 i. Jitz kuul blybe u luege, dass me so i Pouse cha. Mit de nötige Retuschene ir Kabine chame de ir zwöite Haubzyt zum Agriff blose. Wunschdänke! Mi cha nid begriefe, dass me so churz vor dr Pouse muess ds Schpiu schnäu mache. E länge und höche Bau wird vo Aegerte ergatteret und füehrt ir 44. Minute zur erneute Füehrig für e Gascht. Vor em Pousepfiff chöpflet dr Fabian Schuler no über's Gou. Warum chame dä Bau nid i de eigete Reihe hin u här schiebe, uf Absicherig schutte und mit däm Resultat i d'Pouse goh?


Ds Fazit vo de erschte 45 Minute

Büre hets ir erschte Haubzyt nid verschtange, ds Konzept vo Aegerte z'dürschoue, verschwiege de no würksam druf z'reagiere. Us dere Sicht isch Büre, totz viune Müglechkeite, eigentlech no glimpflich dervo cho. Ds Operiere mit länge und höche Bäu isch ou uffäuig gsi. Uffäuig isch aber ou gsi, dass das überhoupt nüt brocht het. Im Gägeteil, mi het sich um die eigete Vorteile brocht. Isch dr Bau flach ghaute worde und im richtige Momänt eim vo üsne schnäue Lüt, wo mir unbeschritte hei, i Louf gschpiut worde, hets figuretlet.


Zwöiti Haubzyt

Für e Joel Tüscher het ds Tränergschpann dr Denis Schneider igwächslet. Nach Widerbeginn vom Schpiu het me gmerkt, dass die eklatante Mängu si agschproche worde. Aegerte isch nümme so unghindert dür ds Mittufäud marschiert, sie hei sich am ne erstarchte FCB gägenüber gseh. Schpielerisch het's jitz besser usgseh, chame das vo dr Effizienz ou säge? Mir wärdes erfahre! Die 51. Minute lot lo ufblitze, was mer obe bhouptet hei. E blitzsubere Agriff gseht ufs mou dr Reto Rüttimann ire ussichtsriche Situation, vorläufig hets no nid wöue klappe. Drufabe het ou dr Schiri si Ifluss ufs Schpiu müesse gäutend mache. Für es Dutzendfoul überchunnt dr Luca Lauper die gäubi Charte, do chame derzue schtoh, oder ou nid. Aber sicher "ou nid", we me gseh het, wie dr Yannik Tüscher umgmäit worde isch, notabene vo hinge. Vo dunkugäub bis füürrot wär aues müglech gsi. Am Schluss hets e Freischtoss für Aegerte gäh, Gringschüttle bis d'Frisur am Arsch isch. E Momänt hets so usgseh, wie är das Schpiu würd us dr Hang verlüre. Witeri kuriosi Entscheide hei no d'Träner u d'Lüt vom Staff zum choche brocht, ar Linie isch bääget u gumpet worde, e läbigi Gschicht dä Fuessbau. Gottlob hei sich d'Schpieler nid au zu heftig vo däm Virus lo aschtecke. 60. Minute, dr Men Meier ersetzt dr Yannik Tüscher. Vo de Chance här isch wider Aegerte am Zug gsi, aber üse Goli het die Ufgab mit Bravur glöst. E Agriff über d'Schtazione Lauper und Schuler landet knapp näbem Gou. Zwe Minute schpöter (77. Minute) lanciert dr Thomas Lerch dr Luca Lauper vorbiudlich, überleit und im Schtiu vom ne Goalgetter erziut är dr Usglich zum 2:2. Ir 80. Minute probierts dr Denis Schneider, ir 81. dr Luca Lauper und ir 84. Minute dr Yannic Kubacki aber d'Effizienz lot z'wünsche übrig. Somit wär d'Frog, wo mir igangs vom Absatz gschteut hei ou beantwortet, leider im negative Sinn. U negativ het ou da Matsch g'ändet. Ir 92. Minute landet e Sunntigsschuss im Chaschte vo Büre.


Matschbilanz



Aktuelle Beiträge

Alle ansehen

Comments