top of page

FCB - Grünstern 0:3 (0:1)

Aktualisiert: 24. Dez. 2022

Meisterschaft 3. Liga, Gruppe 6

Sportplatz Lachen Büren a/A, Samstag, 17. Oktober 2020, 16:00 Uhr




Ufstellig: Stauffer Mikael, Gutbub Luc (71' Kubacki Yannic), Schläfli David, Schneider Denis, Scheidegger Manuel, Lerch Thomas (C), Meier Men, Günther Marco (84' Kocher Marco), Schuler Fabian, Tüscher Joel, Lauper Luca (65' Rüttimann Reto)


Ersatz: Sutter Michael (Ersatzgoali)


Trainer: Rüttimann Reto, Von Felten Patrick


Abwäsend: Bigler Manuel (Privat), Dos Santos Ruben (verletzt), Eggenberger Nick (Beruf), Grogg Reto (Privat), Hofer Mischa (Ferien), Imperiali Diego (?), Käser Simon (verletzt), Leisi Dario (krank), Stauffer Eric (verletzt)


Gou: 17' 0:1 Wyssbrod Luca, 62' 0:2 Weber Till, 87' 0:3 Sljivar Enis


Charte:

27' Lauper Luca (grobes Foul), 48' Meier Men (grobes Foul), 59' Gutbub Luc Reklamieren)


Bemerkige: Konsequänts Umsetze vo de Regle BAG und SFV uf em Sportplatz Lachen. Dank em grossartige Mithäufe vo de Zueschouer chame die Üebig aus Erfoug abbueche.


Büre mit em Rügge zur Wang

Mir hei im Matschprogramm gschriebe: "Bi üs isch 5 vor Zwöufi! Jitz muess me haut ds Glück erzwinge u 90 Minute go, wie dr Tüfu würd hinge noche seckle u z'vermeintlech liechte Räschtprogramm us em Hingerchopf verbanne. Wüu eis isch ou klar, die Tabäuelag vom FCB drückt im Läbe nie us, was üsi Manne vermöge z'leischte. E guet Tag und e top Ischtellig sy aber vonöte, wott me Grünstern zum Stoupere bringe.


Zum Kader und dr Ufstellig

Büre isch mit ere arg dezimierte Egippe aträte. 15 Maa sy uf em Matschblatt gsy, do mit ygrächnet dr Ersatzgoali Michael Sutter und dr Marco Kocher, wo hüt e Doppuysatz gleischtet het. Dr Räschte isch us verschiedene Gründ abwäsend, oder mit de entsprächende Bräschte awäsend gsy.


Scho bim Iloufe isch am gwiefte Zueschouer ufgfaue, dass dr Reto Rüttimann wird uf em Bänkli Platz näh. Zu dere taktische Finte het e Zueschouer gmeint: "Warum zum Donnerwätter fot me de nid mit de euf beschte Manne a, wenn scho so ne hochkarätige Gägner uf Bsuech chunnt und me Pünkt dringend nötig het?" Däm Votum cha ig bypflichte. Ds Tüpfli uf em "i" isch, dass me ne de ersch bringt, weme scho 2:0 im Ahänger isch (65. Minute) u d'Chance uf e mügleche Punktgwinn wyt am Horizont verschwunde isch. Dr Reto isch nota bene ging no dä Bürer mit de meischte Träffer (6).


Erschti Haubzyt, d'Füehrig vo Grünstern liegt ir Luft

Dr Stefan Kubacki und ig sy hingerem Gou vo Grünstern gstande, i dr Erwartig Äktschenbiuder mit Biuder (Stefan) u Fium (ig) vo üsne Stürmer chönne yzfo. Zwöi, drü mou isch dr Manuel Scheidegger über links düre. Z'erschte Mou het är us spitzem Winku gschosse, dr Goali rettet via Latte i Corner. Die angere Mou hei sini Flangge e völlig verweiste Sächzähner atroffe, oder dr Bau isch düre Sächzähner düregsäglet, ohni dass eine dr Sprint azoge het oder wenigschtens versuecht het, a Bau z'cho. Nach dene Aktione isch dr erscht Pfupf dusse gsy, Grünstern het ärnscht gmacht. Sie hei das Schpiu no dis no i d'Finger gno und zeigt, was sie hüt uf em Lachen für Absichte hei. I dr 14. und 16. Minute sy die erschte Knaller uf ds Gou vom Mikael Stauffer abgschosse worde. Ohni lang z'fackle hei dr Enis Skhuvar und dr Luca Wyssbrod us ussichtsricher Position abdrückt. Nach eim vo unzählige Foul im Schpiuzäntrum chunnt Grünstern zum ne Freistoss. Us 20 Meter gfingt dä Bau dr Chopf vom Luc Wyssbrod, chum rächt behindert schliesst är unhautbar zum 0:1 ab.


Grünstern nimmt Fahrt uf

Jitz chunnt die Egippe vom Päscu Arni so richtig i Fahrt. Sie dominiere das Schpiu, attaggiere d'Bürer bereits ir Agriffsuslösig und gö kompromisslos und hert i d'Zwöikämpf, was zu gfährleche Konter füehrt. Sy sie mou am Bau, überzüge sie mit schnäue Baustaffete, einisch zwöi Mou atippe, wyterspiele und loufe u scho wirsch wieder agschpiut. U das mit Tempo und ere Ziustrebigkeit, wo vermuetlech i kere Mannschaft vo dr Gruppe gfingsch. Es grosses Plus isch sicher ou das gringe Leischtigsgfäu i däm Team. Do faut kene usem Rahme, sie demonstriere dr Teamgedanke uf em Rase idrücklech und mit em ne Leischtigswüue, wos schwär isch entgägezha. Büre würkt jitz verunsicheret. Agriffe mit em ne Güetesiegu sy schwär uszmache. Dr Wiue cham ihne nid abspräche, dä isch do. Es glingt de Gaschtgäber eifach nid is Schpiu zfinge, äbe einersyts wäge dr Ufsässigkeit vo Grünstern und angerersyts wüu ds Kollektiv nid funktioniert und me d'Bäu viu z'lang am Fuess füehrt. Erschtens isch das chräfteroubend und zwöitens kontraproduktiv, wüu dr Wäg is Schpiu so nid chasch gfinge. Glingt mou e Agriff ir Entstehig wie gwünscht, isch meischtens nach dr Platzhäufti oder de sicher vor em Sächzähner bi Grünstern wieder fertig. E Torchance cha sich Büre keni meh erarbeite. Grünstern chame oder muess me, ömu de us Sicht vom Trainer, worwärfe, dass sie us dr Überlägeheit zweni gmacht hei und mit em ne magere 0:1 i d'Pouse sy.


Keni Retusche bym FCB

Wär dänkt het, jitz wird uf dr Bank vo Büre reagiert, villech bringe Retuschene chlei meh Stabilität is Schpiu, isch enttüscht worde. Mit glycher Ufstellig und glych konzeptlos het me die zwöiti Haubzyt i Agriff gno. Es verwunderet nid, dass Grünstern dört wytergfahre het, wo sie vor dr Pouse ufghört hei.


Zwöiti Haubzyt

Jitz isch Dominanz vo de Ipsacher eklatant. Dr Bau louft und d'Chance hüfe sech. Dr Mikael Stauffer cha e Flachschuss ume Pfoschte liere und es zwöits Mou isch är bim ne Wytschuss uf em Poschte. D'Verteidigung vo Büre het jitz aui Häng vou z'tüe. E Freistoss vo Grünstern us 18 Meter klatscht a Pfoschte. Churz drufabe rettet üse Goali uf Chöschte vom ne Corner, wo aber nüt Zäubares bringt. Ir 62. Minute isch es so wyt, dr Till Weber wo churz vorhär igwächslet worde isch, trifft zum 0:2 us ca. 18 Meter. Jitz chunnt Bewegig uf Bank vom FCB. Dr Reto Rüttimann ersetzt dr gäub vorbelaschtet Luca Lauper. Uf ne wytere Eggbäu cha dr Mikael Stauffer dr Schuss pariere. Ir 71. Minute ersetzt dr Yannic Kubacki dr Luc Gutbub, was ig für dä wo use muess, nid cha nachvouzieh.


Du hesch kei Ahnig

Aber ig bi jo ke Fuessbaukenner, was mir e Zueschouer uf ne Kommentar vo mir über d'Leischtig vo üsne Manne mit "du hesch jo ke Ahnig" idrücklech z'gschpüre gäh het. Ou wenn ig vo Tute u Blose ke Ahnig ha, schriebe ig ds Brichtli jitz glich no fertig. Mi Kommentar zu dere Bemerkig: "Mir hei uf üser Websyte d'Müglechkeit e Kommentar abzgäh, das cha me gratis u frei vo dr Läbere wäg. Ig säge nume: "Nutze!" Kritischi Stimme zu üser Houmpäitsch trage derzue by, dass sie nume cha besser u läbiger wärde. Aber i dere Beziehig herrscht tote Hose. Gaschtbrichte sy härzlech gärn wiukomme. U was my Person ageit, ig ha Hornhut am Füdle u spiele de nid grad die beleidigti Läberwurscht. Auso houet i Taschte, dass es chrisaschtet. So das hani müesse los wärde, jitz bin ig wieder locker u cha unbeirrt ohni Ahnig, aber mit Konzept, wyterschriebe!


Nid lo ablänke, wyterfahre

Dr Fabian Schuler bringt fasch öppis wie Stimmig i Bude. E Eggbau vom ihm wird vom ne Verteidiger i Corner spediert. Dr ernöit Corner zirklet är diräkt ufs Gou, wo dr unterbeschäftigt Goali vo Grünstern cha ygriefe. Büre bringt offensiv nüt me z'stand. D'Verteidigungsarbeit überwiegt u fordert d'Abwehrreihe u dr Goalie. Befreiigschläg us dr Häufti vo Büre chöme poschtwänded i Form vo Konter wieder zrugg. Grünstern verpasst's dr Dechu druf z'mache. Gueti Chance wärde nid gnutzt. Ir 84. Minute ersetzt dr Marco Kocher dr Marco Günther. Dr Marco Kocher het scho by dr 5:1 Niederlag vom Zwöi gäge Spitzeryter Walperswil 90 Minute i de Bei. Churz druf abe passierts de. Mit em 3:0 vom Enis Sljivar isch d'Schicksau vo de Bürer besieglet. Die sächsti Niederlag im loufende Wettbewärb isch Tatsach u bringt Büre i akuti Abstiegsgfahr.


Fazit

Grünstern het e begeischternde Fuessbau zeigt. Viu Baubsitz und es unagnähms Offensivpressing, Agressivität im Zwöikämpfverhaute und es fasch perfekts Passschpiu bi viu Loufarbeit. Das isch definitiv nid e Gägner wo Büre muess schlo, aber trotzdäm muess me chlei enttüscht sy, wie sech dr FCB het lo beidrucke. Das Team ghört mit dere Schpiusterchi definitiv e Klass höcher ufe. Mir wünsche am Päscu u syne Manne viu Erfoug uf däm Wäg!


Nöchschte Sunntig

Am Sunntig 25. Oktober 2020 findet in Diessbach ds Schpiu statt.

Pieterlen schlot Aegerten und Madretsch gwinnt gäge Diessbach/Dotzigen. Zudäm verlürt dr SC Rüti deheim gäge Azzurri. Trotz dr Niederlag gäge Grünstern gseht Tabäue nid ganz so strub us, wies hät chönne cho. Das isch am nöchschte Sunntig die Chance! Das wird für e FCB zum Wägwieser, i weli Richtig das es geit. Do derzue bruchts e Usnahmeleischtig und es Angaschema, wo das vo däm Matsch klar überstiegt. Es isch ou dringend nötig, vor erschte Minute a d'Kontroue z'gfinge. Der FCB muess ganz sicher es bis i d'Hoorspitze motivierts Diessbach/Dotzigen erwarte. Giele es isch nid jitz nid Zyt dr Gring i Sang z'stecke. Dir sit besser aus Tabäuelag zeigt. Und eis Jungs – mir gloube a öich! Hopp FCB



Fotos: Stefan Kubacki, Hans Peter Gribi

Aktuelle Beiträge

Alle ansehen