FCB - FC Täuffelen 4:1 (3:0)

Hans Peter Gribi
20. Apr.
4 Min. Lesezeit

Samstag, 18. April 2026, 16:00 Uhr, Fussballplatz Lachen Büren an der Aare

Meisterschaft 4. Liga

Text: Hans Peter "Budi" Gribi

Foto: Stephan Kubacki

Daten zum Match: Louis Polverini

Aufstellung FCB (4-1-4-1)

Noe Fankhauser, Fabian Hänzi, Nick Eggenberger, Denis Schneider, Marco Günther, Men Meier, Silas Adam, Joel Miguel Zambrano (60. Numa Marmier), Fabian Schuler, David Vuilleumier (60. Rafael José Azevedo Alves), Yannic Kubacki (67' Daniel Marti)

Ersatz

Tim Blatter

Abwesend

Manuel Bigler (gesperrt), Ruben Dos Santos (Familienfeier), Fabian Jenni

Verletzt

Mario Bärtschi (Schleimbeutelentzündung an der Ferse), Alex Jorge Files, Joel Knörr, Luca Lauper, Dario Leisi (Leisten-OP), Simao Lopes (Bänder überdehnt), Joel Tüscher (frisch von der OP auf dem Lachen), Noah Raul Zambrano (im Spiel gegen Ins Müntschemier 2 Rippen gebrochen).

Allen Verletzten gute und schnelle Genesung.

Staff

Patrick Meier (Trainer), Gianluigi Maffeo (Assistenztrainer)

Tore

02' 1:0 Yannic Kubacki auf Pass von Denis Schneider und Silas Adam

16' 2:0 Fabian Schuler Kopfballtor auf Ecke von Joel Zambrano

45'+5' 3:0 David Vuilleumier mittels Penalty, Foul an Dävu selbst

59' 4:0 Fabian Schuler, Penalty, Foul durch den Torwart an Fäbu

78' 4:1 Fabian Jenni

Karten

Keine!

Bemerkungen

Im Parallelspiel schlägt der nächste Gegner des FCB FC Bözingen 34 den Leader FC United Hermrigen-Jens in Jens mit 0:1 und hievt den FCB auf den ersten Platz.

Vorwort

Ig muess zu mir Schand zuegää, dass ig no nie so weni vom ne Schpiu vom FCB ha gseh, wie hüt. Einersysts isch das sicher am früeche Gou zuezschriebe und angerersyts dr Harmlosigkeit vom Gägner. Dr FCB isch nie Gfahr glüffe das Schpiu zverlüüre. So het me sech haut am Schpiufäudrand guet unterhaute, chley plagiert und ab und zu ds Muu zum Bächer mit chüelem Bier gfüert. E sinnvoui Bekämpfig vom ne üsserscht längwylige Schpiu. Entschprächend emotionslos und churz faut hüt dr Bricht us. Merci für dis Verständnis.

Erschty Haubzyt

Zwöiti Minute, dr FCB blööterlet nid lang und schrittet entschlosse zur Tat. Dr Denis Schneider schickt dr Silas Adam us dr eigete Häufti uf d'Reis, dä zieht bis zur Grundlinie und passt zum Yannic Kubacki, problemlos cha dr Yannic us ca. 4 Meter zur Füehrig yschiebe. Kubacki trifft wieder! Büre dominiert das Schpiu rybigslos, geit aber ou fahrlässig mit de Chance um. Anschtatt vorzlege, passt me sech am Niveau vom Gägner a und lot gueti Chance zum Abschluss us. Es isch nid verwunderlich, dass me so am Gägner ou Tür und Tor öffnet. Und fasch wär das Larifari is Oug gange. E Schpieler vo Täuffelen bricht ir Mitti düre und cha alleini ufs Gou zieh. Dr Noe Fankhauser schtürmt usem Gou und rettet mit em Chopf, e haarschtröibendi Szene. Minutelang isch dr Noe nümme uf dere Wäut und gseht Schtärnli. Nach intensiver Pfleg, reschpektive blybe liege und sech erhole, cha dr Noe erfröilecherwys wyterschpiele (11. Minute). So Giele, dir müesst e Zagge zuelegge und ds 2:0 sueche! Churz drufabe muess dr Noe Fankhauser e Freischtoss us zwänzg Meter entschärfe und dütet dermit a, dass im Oberschtübli wieder aues dischelet isch.

16. Minute, e Corner vom Joel Zambrano gfingt dr Chopf vom Fabian Schuler, dä cha praktisch unghinderet zum 2:0 ychöpfle. Mit em 2:0 Vorschprung im Hingerchöpf git dr FCB dr Ton a. E Freischtoss vom Joel Zambrano lot dr FCB churz juble, aber dr Marco Günther verhinderet mit sir Absytsschtellig ds 3:0. Paar Minute schpöter cha e schön ynezirklete Corner vom Joel Zambrano nid verwärtet wärde, und e Wimpereschlag schpöter verpass dr Yannic Kubacki e Freischtoss vom Joel Zambrano um Haaresbreiti. Churz drufabe schpiele sich dr Fabian Schnuler und dr Yannic Kubacki mit em ne Doppupass herrlech düre, aber dr Fäbu verpasst sy zwöit Schtreich. 38. Minute, e Freischtoss vom Fabian Schuler schtrycht üsserscht knapp über d'Latte. E Minute schpöter verpasst e Schuss vom Joel Zambrano, nach Pass vom Yannic Kubacki, ds Viereggige nume knapp. Büre sött längscht 4 oder 5:0 füehre, chunnt aber nach em ne Foul am David Vuilleumier churz vor dr Pause no zum ne Penauty. Dr Dävu füehrt säuber us und verrumt das Ding souverän y rächt unger Egge.

Zwöiti Haubzyt

Näme mir vorwäg, dass ds Schpiu y dr zwöite Haubzyt nid wäsentlech besser, schprich interessanter worde isch und me nid gross Inträsse zeigt het, d'Täuffeler us em Lachen z'schiesse. Churz bevor dr Trainer e Drüüfachwächsu macht, rückt dr Fabian Schuler wieder is Zäntrum vom Inträsse. Är wird vom gägnerische Gooli gfoulet und cha dr fäuig Penauty souverän versänke (59. Minute). Nächhär chunnts zum erwähnte Drüüfachwächsu und siebe Minute schpäter het ou dr Yannic Kubacki Füürobe, dr Daniel Marti louft y.

Dr Nick Eggengberger verpasst ds Gou um Haaresbreiti und Täuffelen chunnt wie d'Jungfrou zum Ching zum Ehreträffer. E schöni Leischtig isch es gsy vom Fabian Jenni, us 15 Meter versänkt är dr Bau unhautbar y unger lingg Egge (78. Minute).

Wenn die einte nid wei und die angere nid chöi, isch säute es Schpektaku z'erwarte. So geit das Schpiu harmlos und ohni wytere Höhepunkte z'änd. Dr Schlusspfiff vom guete Schiedsrichter erlöst Mann und Maus und so chame sich ungschtört de Gschpräch und em chüele Bier widme.

Fazit

Dr FCB isch nie, aber ou gar nie Gfahr glüffe, ds Schpiu z'verlüüre. Mi isch ds Gfüeu nid los worde, dass das farblech und muschterlech wiude Dress vom Gägner d'Bürer irritiert het und Täuffeler dran schwär z'trage hey gha.

Pflicht erfüut, drüü Punkt verbuechet und grad no uf e Trohn gschtiege. Was wott me meh, am ne wunderschöne Apriutag?

Mir gratuliere und dänke scho as nöchschte Wuchenänd, wenn de dr FCB uf es angers Kaliber trifft, FC Bözingen 34, dr Bezwinger vo FC Hermrigen-Jens. Denn heissts de Gas gää, konzentriert sy und die Chance wo me sech erarbeitet nütze. E Umfauer wey mir üs jo nid leischte, jitz hey mir Bluet gläckt.

Hopp FCB!