top of page

FCB – FC Täuffelen 4:1 (0:0)

11. Mai 2019, Sportplatz Lachen Büren an der Aare


Schappo Giele, e ryfi Leischtig. Ds Bäuali louft, nid lang ume gfätterle, Gas gäh und uf ds Gou chlepfe. Das isch Fuessbau, das isch Äktschen, e FCB wo Fröid macht.


Teppichetasche

Nach däm Schpiu isch mir eis glasklar worde. Jitz müesse die Verantwortleche a Verhandligstisch (das hei sie gloub ou vor, hani uf em Latrinewäg vernoh, pscht de nid wyter säge). Was die drü eutere Semeschter (fuessbauerisch gmeint natürlech) Lerch Thömu, Rüttimann Reto u Scheidegger Mänu (aufabetisch ufglischtet), Samschtig für Samschtig abliefere, das isch grossi Klass. Die drei hei Schpöiz im Füdle, oder minet wäge Pfupf im Arsch, wo mir im Momänt nid druf chöi verzichte. U am Schluss emänd profitiere üsi Junge enorm vo dr Schpiufröid und Routine. Das chame nid wäg schnurre! Auso Giele vor Teppichetasche, figureetlet chlei a däm Zueschtand ume.


Bevor's los geit!

Bevor ig uf ds Schpiu igoh, muess öppis zu dene zwöi Biuder gseit si. We üsi Manne so i ds Schpiu gange wäre, wie d'Mimik (Mouggere) usdrückt, die wäre sang- und klanglos abgschiffet. Absolut geil isch dr Yännu "hoi zäme, auso de bini haut do", dr Rüttimaa het äuä kes Gummi i de Hose. Gäbet däm Löu es Gummi (chönnt vom Hanspeter Latour si)! Dr Denis Schneider, e Sauzsüüle! Dr Nick weiss no nid so gnau wo n'är isch (het üs de aber eines Besseren belehrt). Dr Louper zersch es Tanzschrittli u nächär vouer Optimismus! Dr Mänu amüsiert sech, die zwe Bärner luege vo de Bire i d'Schnitz, jo und dr Ruben ou grad. Dr Simu u dr Thomi hei zäme abgmacht, kuul z'winke, aber de nume einisch u de no chlei härestoh!



Ufschtellig FCB:

Chäser Simu, Günther Marco, Lopes dos Santos Ruben, Scheidegger Mänu, Lerch Thömu (C), Rüttimaa Reto, Eggebärger Nick, Tüscher Yannik (46. Schläfli Dävu), Schneider Denis (85. Schtouffer Eric), Schueler Fäbu, Louper Luca (78. Kubacki Yannic)


Ersatz: Tüscher Schöggu


Träner: Tüscher Pädu, Vo Fäute (VoFi) Patrick


Dr Massör: Schteiner Reto


Nid derby: Hofer Mischa, Grogg Reto


Verletzt si: Imperiali Diego, Kocher Damian, Schtouffer Miggu


Gou:

58. 0:1 Eigegou, 68. 1:1 Rüttimaa Reto, 74. 2:1 Schueler Fäbu, 81. 3:1 Rüttimaa Reto, 85. 4:1 Schueler Fäbu


Schiedsrichter: Hüt hei mir gar nüt z'möffele gha!


Büvette: "Five Star Team" mit em Menü Szegediner-Gulasch (rassig und erschtklassig)


Vorgeplänku

Wo ig uf e Schuttplatz cho bi, hani gmeint, öb ächt do es Goufturnier schtattfindet? Ha keni Löcher gfunge, gschniglet u gschnagleti Mönsche (ha bau wöue Laggaffe säge, aber das isch jo nümme so) mit Wägeli im Schlepptau si ou keni ume gsi. Ah, de bin ig do richtig, uf em Lache z'Büre! E Teppich vom ne Rase, niene Gjät u z'Bord gmäjt. Do chönsch grad hüüle vor Fröid. Mir wärde verwöhnt!


Es geit los, erschti Haubzyt

Mir hei i de letschte Mätsch gäng chlei feschtgschteut, dass me mit de Chance viu z'fahrlässig umgeit. Das isch ou hüt gäge Töiffele nid angers gsi. Eis muess me aber no vorusschicke. Ds Wätter, wo ir letschte Zyt üs Matschbsuecher gäng chlei schyssig gmacht het, het ou hüt müesse dryfingerle. Dr Paraplüi hets de uf au Fäu brucht. Chlei rägne, chlei chutte und zwüschedüre het me fasch chlei müesse gütterle. Äbe, ou hüt het me sech ir erschte Haubzyt, notabene gäge Wind, gueti Chance erarbeitet, ir zähte Minute sogar dr Pfoschte küsst, meh het aber nid wöue useluege.


Sit paar Schpiu het me ou a dr Taktik gschrüblet, unger angerem dr Mänu Scheidegger uf em lingge Begg lo ufloufe. Das het dr Schpiuwiis guet to, het Syschtem i ds Ufbouschpiu brocht u zuesätzlech tüe sini Vorschtöss dr Gägner verhürsche, schrysse d'Verteidigung usenang u schaffe Platz ir Mitti. Dr Mänu isch dört ungemein effektiv, mi gseht, dass ihm dä Poschte Fröid macht.


Ir Vorrunde, mi het nach em Pouseschtand vo 2:1 für Töiffele no 5:3 gwunne, isch es mit em Chischte schiesse öppe glich harzig zue- und härgange. Am Schpiuwitz hets nid gfäut, am Isatz sowieso nid, eifach bi der cheibe Effektivität hets gharzet. Liechti Vorteile für Büre hei üs aber lo hoffe, dass es de ir zwöite Haubzyt mit Windunterschtützig chlei fädered u Büre mit em Gouschiesse chlei zum Busch us chunnt. Töiffele het i der Beziehig vo däm Vorteil nid chönne profitiere, ou wüu dr Simu zwöi Mou isch parat gsi (Foto), oder d'Verteidigung schtatt z'penne äbe häuwach isch uf em Bitz gschtange.


Z'guete vo dr erschte Haubzyt isch, dass me mit em ne suubere Tschöpli i Kabine het chönne go Predig ablose.



Zwöiti Haubzyt

Ig chönnt fasch es paar Wort us em letschte Bricht kopiere "Büre entfesslet, furios, nid z'brämse". Für das Schpiu chieme die Wort bi de Töiffeler nid guet a. Aber e chlei i die Richtig isch es de scho gange. Dr FCB ziuschträbiger, und wie vermuetet, mit em Wind im Rügge mit schnäuem Überbrügge vom Mittufäud u schnäue Abschlüssversüech. Es passt eifach nid i ds Biud, dass ds 1:0 im Bürechaschte ischlot. Das entbehrt jeder Logik und em Schpiuverlouf no weniger. Und trotzdäm isch es eso. Es isch nid em Chnöischlotter vo üser Defensive zuezschrybe, e unglücklechi Abwehr und e verzwieflete Rettigsversuech si Pate gschtange. Das si mir üs fang gwanet, üser Giele bruche e Rückschtand, dass si nächhär chöi ds Gaspedau vou düretschaupe. Ir 68. Minute zieht dr Schueler Fäbu usse düre, flangget i Sächzähner uf e Rüttimaa Reto, dä verrumt souverän zum 1:1. D'Charte si nöi gmischlet. So, jitz louft z'Motörli ohni z'hueschte u Büre isch klar die besseri Mannschaft. Extrem viu Agriff loufe über d'Site, ou dä, wo zum 2:1 gfüehrt het. Dr Rüttimaa Reto louft usse düre, gseht dr Schueler Fäbu i Position loufe, leit dr Bau zrugg, dr Fäbu versänkt mit em ne Flachschuss (74. Minute).


E chline Unterbruch für ne Randnotiz

E chlini Randnotiz so näbedüre. Prinzipiell isch Offside denn, wenn dr Schiri Offside pfyfft und nid we me wott Offside gseh, oder Brüue blau gschprängglet isch. Pfyfft dr Schiri nid Offside, dr Räschte chöit dir öich am Füdi abfingerle. Tatsach isch, dass mir jo eh aui Gou säuber gmacht hei. Liebi Töiffeler uf em Bänkli vor em Hüsli (Garderobe), näht mir das nid bös, aber es muess glich gseit si.


Wyter im Täxscht

Ir 81. Minute landet e Abschutt vom Töiffeler-Goli ir Platzmitti, dr Rüttimaa Reto schnappt sech dä Bau, louft i Sächzähner ine u schiebt am Goli verby zum 3:1. Vier Minute schpöter isch aues klar. Eine vo de unzählige Löif vom Scheidegger Mänu bringt z'aues entscheidende 4:1. Dr Mänu passt zum Rüttimaa Reto, dä gseht, dass dr Schueler Fäbu i Positions louft, dr perfekt Pass chlepft dr Fäbu unger d'Latte.


Dä Matsch het du glich no dr verdient Sieger gfunge. Löuferisch u schpielerisch hei sech üsi Lüt gschteigeret u ds Ziuwasser vor Pouse het zu de entscheidende Impulse bygschtüret.


Schlussbuggee

A däm Platz verzichte mir normau druf, uf einzelni Schpieler izgoh. Es brucht schliesslech jede, öb am Zyschtig oder Donschtig im Träning, oder am Smaschtig uf em Platz. Aber speziell isch hüt ufgfaue, wenn dr Louper Luca, Atrieber und regumässige Torschütz usnahmswiis einisch e schlächte Tag yziet (dä gäh mir ihm problemlos), dass angeri do si, wo d'Lücke füue. Z'gliche giut ou für e unermüedlech Kämpfer Tüscher Yannik. Är het ir Haubzyt für e Schläfli Dävu, wider e gueti Leischtig Dävu, wägem ne Misstritt Platz gmacht.


Die Bereitschaft, für enang izschtoh isch ou i dere Wuche idrücklech zum Usdruck cho. E Isatz leischte, wo nid autäglech isch u fei chlei a z'Subschtanz geit, sie si praktisch mit dr ganze Eggippe awäsend gsi. Es geit um Hüehner zügle, do derzue de zum ne schpätere Zytpunkt meh. Reschpäkt!


No öppis zur aktuelle Tabäue. Bis zum hütige Tag het Büre i der Gruppe am meischte Gou gschosse. So verchlemmti Tüpe si mir de glich nid. Drü Mou het me zu Null gschpiut, dr höchscht Sieg isch 10:2 usgange (Iberico) u die höchschti Niederlag isch 2:0 gsi (Müntschemier).


Dr nöchscht Matsch

Nöchscht Wuche chunnts de zum Derby Längnou gäge FCB. Dä Matsch isch am Sunntig, 19.05.2019, 10:15 Uhr in Längnou. Es brucht de üsi Ungerschtützig Froue und Manne, Modis u Giele. Auso de nöchscht Sunntig nid yhuure, wüsse was mer z'tüe hei, zum Näscht us uf Längnou. Hopp FCB!



Aktuelle Beiträge

Alle ansehen

コメント

5つ星のうち0と評価されています。
まだ評価がありません

評価を追加