Meisterschaft 4. Liga, 30. April 2019, Sportplatz Lachen Büren an der Aare
"Wenn si mit däm Schpöiz im Füdle gäge Müntschemier as Wärch gö, de potzwoumäu". So het dr letscht Artiku ufghört. U das Potzwoumäu" chame definitiv lo schtoh. Eis zu nuu hei si gwunne u si mit zwöi Punkt Rückstand, zäme mit Grüenstärn, hinger em Erscht. Jajaa, es isch Müntschemier.
Erschtens isch dr Wättergott e Bürener u zwöitens het üse Platzwart, heisst sit neuschtem "Platzi", ou öppis göttlechs a sich. Ds schönschte Wätter und e Troum vom ne Platz. Die Zwe hei ihres Handwärch vou im Griff, gratuliere u merci Jarno, dr Anger ghörts jo äuä sowieso nid.
D'Ufschtellig vo Büre:
Schtouffer Miggu – Günther Marco – Schtouffer Eric – Lopes Dos Santos Ruben – Tüscher Schöggu – Lerch Thömu – Tüscher Yänu – Schuler Fäbu – Scheidegger Mänu – Rüttimann Reto – Louper Luca
Ersatz: Kubacki Yannic, Kocher Damian, Hofer Mischa
Träner: Tüscher Pädu u Vo Fäute "VoFi" Patrick
Gou: 67. Minute Scheidegger Mänu
Gäubi Charte: Keni, dr Schiri het se vernuschet!
I dr erschte Haubzyt het me z'gschpüre übercho, dass es fey chlei um öppis geit. Fahrig u närvös isch me a z'Wärch u het sich dr eint oder anger Fäupass gönnt. I dr Schtartphase hets de glich no Platz gha, für chlei Närvechitzu. Bim ne Schteilpass vom Gägner isch der Miggu wie ne Furie zu däm Chaschte usecho, u het im Sächzähner Bau u Gägner furtputzt. Aues het uf e Pfiff vom Schiri gwartet, dä het du aber gfunge, dr Miggu heig das super gmacht. Mir chöi üs mit em ne schmunzle der Meinig aschliesse. Wo's de nid viu schpöter no am Pfoschte vo Büre klefelet het, isch z'Schtimmig nid grad i Chäuer gheit, aber läär düreschnuufe het me de scho müesse. Wo sech üsi vo däm Schreck erhout hei, si sie besser i ds Schpiu cho u hei versuecht, Druck uf e Gägner uszüebe. Das isch bis vor Verteidigungszone nid so schlächt glunge, aber es het chum e gfährlechi Szene usegluegt. Zwüschedüre het dr Miggu no schnäu eine ume Pfoschte gliiret. Bis zum Pousetee isch ds Schpiu so vor sech häre plätscheret, praktisch keni Torszene si z'bewundere gsi, mi het sech gägesitig neutralisiert. Zwöikämpf, si zuenämend herter gfüehrt worde, ohni dass es unfair zue u härgange wär. Es isch jo no viu so, we me grossi Erwartige oder ds Gfüeu het, das git es Bombeschpiu, hout di praktisch nüt zu de Socke us. Die Ussag trifft, bis uf zwe Ufreger, uf die erschti Haubzyt zue. Mi chunnt nid drum, d'Frog z'schteue, warum nume eis Fründschaftsschpiu hät söue für optimali Verhäutnis sorge. Enusode, nid grüble, es het jo giiget.
Nach em ne süffige Teeli, mir hei öppis bessers gha, isch es wider wytergange. Aus Zueschouer het me nach de erschte Minute z'Gfüeu übercho, dr Pädu u dr Vofi heig e die rächte Wort gfunge, reschpektive d'Schwachschteue ussortiert u gseit, wo dr Bartli dr Moscht hout. Uf ei Chlapf isch dr Bau gloffe, über mehreri Schtatione het me kombiniert u zwüschedüre het e Schteilpass uf die schnäue Schpitze Gfahr brocht. Büre het jitz meh vom Schpiu gha und ab und zu mit geniale Schpiuzüg zeigt, was do für Talänt schlummere. Es isch wider eine vo dene Schteilpäss uf e Mänu gsi, wo du zum Erfoug gfüehrt het. Mir wo bi dr Garderobe schtationiert si gsi, hei scho z'Wort "Offside" im Muu gha, wo dr Schiri pfifft und uf d'Mitti zeigt. Trotz Offside muesch de dä no mache. U dr Mänu het dä sydefin ineghoue. D'Vergangeheit het üs am Schpiufäudrand scho viumou fasch lo düredräie. Aber die Gfahr, die isch a däm Samschtig nid so gross gsi. Dr Gascht us Müntschemier het nümme viu chönne zämmebrittle u Büre het relativ souverän die knappi Füehrig über d'Runde brocht.
Es isch nid ganz das Furioso gsi. Büre het sich aber angaschiert und schtabiu zeigt. Mi het gschpürt, dass si die drüü Punkt wei, dass si zur Schpitze nid wei lo abriesse. I däm Schtiu chas de sauft wytergo. Guet gsi Giele!
Es Wort zum Gägner. Müntschemier hät gnue Grund gha, sech chlei verschouklet vorzchoh. E Penalty wo si nid überchöme und es Gou wo eigentlech nid hät dörfe zeue. Si müesse sich aber dr Vorwurf lo alose, nid so verreckt viu für d'Schpiu ungernoh zha und ou nid aues gmacht z'ha, für ne Gägner entscheidend z'dischtanziere. Si hei sich uf und näbem Platz aus gueti Verlürer zeigt und si trotz der Niederlag fey chlei lang uf em Lache blibe hocke. Das muess ou mou gseit si.
No es merci a d'Büvette wo mit Schwung u Schpass schüsslewiis Ghackets u Hörnli u literwiis Gsöff a d'Gaschtig brocht hei.
No ei gueti Nachricht. Die zwöiti Mannschaft het im ne rassige Schpiu em SC Radufinge d'Gränze ufzeigt u sächs zu nuu gwunne. Bravo!
Es churzes Resümee: Schöns Wätter, e geile Platz, sächs Punkt!
Comments