top of page

FCB - FC Grünstern 3:4 (2:1)

Aktualisiert: 11. Dez. 2022

Meisterschaft 3. Liga / Gruppe 6 - 26. Oktober 2019, 16:00 Uhr Sportplatz Lachen Büren an der Aare


Ufschtellig FCB: Simon Käser, Reto Grogg (75. Yannic Kubacki), Lopes Dos Santos, David Schläfli, Manuel Scheidegger, Luc Gutbub, Thomas Lerch (C), Yannik Tüscher (68. Nick Eggenberger), Men Meier (65. Raphael Schuler), Reto Rüttimann, Joel Tüscher Ersatz: Mikael Stauffer (ET), Lars Freiburghaus, Mischa Hofer, Eric Stauffer Nid derby: Marco Günther (Militär), Diego Imperiali (2. Mannschaft), Luca Lauper (Rekonvaleszent), Dario Leisi (verletzt), Denis Schneider (Privat), Fabian Schuler (Miliitär)


Bemerkig: Herr Achim Faul, Vizepräsident Fussballverband Bern/Jura übergit beidne Mannschafte d’Ufschtiegsdiplom Staff: Patrick Tüscher und Patrick „Vofi“ Von Felten (abwäsend), Reto Steiner (Massör) Gou: 22. 0:1 Stefan von Niederhäusern, 31. 1:1 Ruben Dos Santos (Penauti), 39. 2:1 Reto Rüttimann (Doppelpass mit Joel Tüscher), 63. 2:2 Michael Jenni, 74. 2:3 Stefan von Niederhäusern (Penauti), 84. 3:3 Reto Rüttimann, 85. 3:4 Stefan von Niederhäusern

Gäubi Charte: 45.+1 Thomas Lerch, 68. Ruben Dos Santos, 73. Manuel Scheidegger, 90.+2 Yannic Kubacki Platzspiiker: Louis Polverini Notize für d’Redaktion: Louis Polverini Lektorat: Wäge mim drängte Programm isch es Nochläse nid müglech gsi. Bitte tüet mini Fähler entschuudige. Merci!


D'Schpiukultur isch ir Garderobe blibe

Wie üse FCB das Schpiu agange isch, het uf d’Zueschouer nid grad extrem e motivierte Idruck gmacht. Irgendwie luschtlos und ideelos, d’Schpiukultur wo me zwiefulos chönnt vorwiese hei sie i dr Kabine lo ligge. Parallele a Matsch gäge Rüti si obsi cho. Bis i die 30. Minute het weder Grünstern no hei üser Manne öppis für d’Attraktivität vom Schpiu bytreit. E harzigi Sach, mit nuu Unterhautigswärt. Ufgfaue isch im wytere, dass wichtigi Lüt im Gfüeg vor Egippe a däm Tag unger ihrem Wärt gschpiut hei u fouglech e pflegti Schpiuwys nume e beschränkti Chance het gha. E Konschtruktivi Kommunikation uf em Fäud, wo am hütige Tag es wichtigs Momäntum hät chönne sy, isch ou nid gross uszmache gsi.


D'Schpiufäud

Für dä bluetläär Uftritt (Schwärpunkt erschti 30 Minute) cha me de nid öppe ds Schpiufäud i Pflicht näh. Für das wo aues isch obenabe cho vor u nach dr Schpieverschiebig gäge Evilard isch das Terrain vom Jarno Beyeler bigo bello härgrichtet worde. Im Verlouf vo der Begägnig het me jo ou zeigt, dass es angers cha go, we me chley Eier zeigt.


Aber vo Aafang a

Het me Schtartformation vo Büre schtudiert, isch eim scho chlei gschmuech worde. E Fabian Schuler und e Luca Lauper, beidi mit wichtige Roue i der Mannschaft, sy nid zur Verfüegig gschtange. Dr Fabian Schuler ir Offensive mit sine Idee und Loufwäge enorm wichtig und im Abfoh vo Gägeagriffe ab dr Mittulinie e Bank het äbeso Lücke hingerloh wie dr Luca Lauper, wo us nüt es Gou cha mach und im Eis-gäge-Eis unheimlich schwär uszrächne isch. Grünstern isch e chlei wacher us dr Kabine cho. Bereits ir 6. Minute muess dr Simon Käser pariere. Auerdings isch hinger däm Schüssli nid würklich Pfupf gsi. Es paar Minute schpöter het dr Gägner us em ne Eggbau nid viu meh zschtang brocht. Ir 8. Minute glingt Büre die erschti einigermasse vernünftigi Offensivaktion. Dr Schuss vom Luc Gutbub, ou nid grad e Granate, landet aber näbem Gou. Wiederum drei Minute nach der Aktion chunnt Grünstern zum ne Freischtoss us 25 Meter, dr Simu het nid mou mit dr Wimpere zuckt. Ou dä Bau landet näbe dr Chischte. Im Gägezug versuechts dr Yannik Tüscher, ou sys Ungerfange passt sich am Zeigte a u landet näbem Viereggige, wo eigentlich ds Runde sött ischloh. Zu der magere Choscht chunnt es Kapitu meh derzue i Form vom ne Corner für Grünstern. Dr Simon Käser wehrt ab und dr Nachschuss schlot irgendwo im Induschtriequartier y. Mir schrybe scho die 20. Minute u hoffe, dass ändleche öppis passiert wo ds Härz erfröit. Es isch öppis passiert, dä mit em Härz chasch sauft vergässe, usser hesch es grüens Chäppi uf dr Bire. Grünstern geit i Füehrig u wie das passiert isch, reiht sich nahtlos is farblose Gschehe y. Mi bringt dr Bau nid wäg, am schnäuschte reagiert dr Stefan von Niederhäusern u hout dä herrelos Bau i d’Masche (22. Minute). Jitz wo me ds Mässer wieder am Haus het, cha me und wott me. Auso es geit jo! Vorerscht probierts dr Yannik Tüscher mit em ne Wytschuss, wo ds Ziu nid gfingt. Ir 31. Minute wird dr Reto Rüttimann für einisch perfekt lanciert, dr Pascal Wolf schtürmt zum Gou use u leit dr Reto penautiryf. Mir wüsse, wär jitz zur Usfüehrig chunnt cho häre zbresche, dr Ruben Dos Santos. Und är macht sy Sach einisch meh perfekt und schiesst zum Usglich y. Jitz het me zur Schlofmützigkeit use gfunge. Erschti Asätz vo Baustaffette und glungne Zueschpiu wärde sichtbar. Es isch de fang Zyt gsi! Ir 37. Minute chunnt Grünstern zu re guete Chance, üse Simon Käser isch häuwach und pariert. Zwe Minute schpöter hout dr Joel Tüscher, sys Zwöikampfverhaute isch vorbiudlich, e verlorne Bau zrugg und särviert ne am Reto Rüttimann pfannefertig ufs Guudfüessli. Do muesch dr Reto nid zwöi Mou bitte – suverän schiebt är zum 2:1 y. Schpiu kehrt u was mittlerwyle bote wird, chame fang mou aluege. Es isch jo eigentlech scho erschtunlich, dass me über ne Haubzyt ohni Sauz u Pfäffer, so viu cha schrybe!



Zwöiti Haubzyt

D’Haubzyt isch e Minute aut, chauberet am FCB dr Schytstock. Dr Schiedsrichter annulliert e Träffer vo Grüenstärn. Zerscht cha dr Simu Käser pariere und vor em Nachschuss wird dr Ruben Dos Santos gfoulet. Es hät wieder härzlech weni gfäut, wär me für d’Nachlässigkeit beschtroft worde. Dr Yannick Tüscher prüeft dr Goli vo Grünstern, är cha i Corner befreie. Einisch meh isch e Corner e harmlosi Sach, wo dr Gägner nid gforderet wird. Dä mit de schtehende Bäu, wo viumou a Harmlosigkeit nid z’überbiete sy, hei mir scho mängisch gschriebe. U es blibt e Schwächi, Fortschritte sind praktisch nid uszmache, Zyt dass me uf Magglinge alütet und es wüchigs Träningskämp „Schtehendi Bau und was me chönnt drus mache“ buechet. Vier Minute schpöter chasch säge „dito“, wieder e harmlose Eggstoss, wieder nüt mit ahhh und ohhh. Es louft wieder einisch e schöne Agriff für Büre u dr Reto Rüttimann wird muschtergüutig agschpiut. Bevor är dermit öppis cha afoh, het är d’Nase knapp überem Rase. Dr Freischtoss vom Manuel Scheidegger schtricht aber nume über d’Latte. Drei Minute sy vergange, schliesst dr Luc Gutbub, hüt het är nid wie gwünscht is Schpiu gfunge, e Agriff mit em ne satte Schuss ab. Gfüut dr erscht Schuss wo sich dr Pascal Wolf cha uszeichne. Mir sy ire Druckphase u dr Reto Rüttimann zieht allei uf e Goli. Dr Versuech vom ne Tunäu misslingt, e gueti Chance zum Usbou vo dr Füehrig isch vertoh. Wyteri paar Minute schpöter, scho wieder het me sech i ussichtsrichi Schussposition brocht, loht me ernöit e Chance zum so wichtige 3:1 ungnützt. Wenn sich das nume nid rächt! Chum fertig dänkt, scho zapplet ds Netz bi Büre. 63. Minute dr Michael Jenni bringt Grünstern zrugg is Schpiu. Söu ig dä bringe? „Wär se nid macht…“Nei, löh mirs lo sy, aber schtimme tuet haut dä abdroschnig Schpruch scho. Bsunders denn, wenn dr Gägner nach em Aschlussträffer ou no grad i Füehrig geit. Büre wieder im Druck. Das si chöi mit Druck umgoh, hei sie scho bewiese. Ou i der Situation leit me e Zagge zue. Mi gwinnt zwar ke Schönheitspriis, do häts es paar Fäupäss weniger brucht, aber mi zeigt Wüue u kämpft. Ir 80. Minute schiesst dr Reto Rüttimann übers Gou, machts de aber 4 Minute schpöter besser u schiesst zum Usglich y. Über e Siegträffer z’lamentiere bringt nüt, es isch passiert. Weme Punkt wo üs dr Simu scho grettet het zämezeut, die vom Ufschtiegsjohr de ou no grad, de chame ihm dä Bock hundert Mou vergäh. Ig bi überzügt, dass het d’Egippe scho uf em Platz erlediget.


Copy / Paste


Fazit

Es louft die 84. Minute, Büre het düre Reto Rüttimann dr Usglych gschafft. Jitz muess me sech Gedanke mache, wot me dr Spatz i dr Hang oder Tube uf em Dach. Söu heisse, für die letschte Minute wieder ir gwohnte Manier verteidige und es Punkt rette, oder blindlings wyter schutte u juschtemänt no verlüüre. So ne Entscheidig darf nach mir Meinig ou uf em Platz es Thema sy, wüu dört gschpürsch dr Puus am beschte. Aber blauöigig het me wyter töggelet. Gschtohle het Grünstern dä Sieg nid. Gäge es ungwohnt fahrigs Ufträtte vo Büre hets aber ou nid e Topleischtig brucht. Z'Glück, i der Saison schüsch eher uf Bürersyte, het sich uf d'Syte vom Gascht gschlage und mit zwöi Gou wo so nie dörfe faue, d'Niederlag iglüte. Aber eis isch ou klar, dass Grünstern zu söttige Situatione chunnt, isch nid nume am Goli gschuedet, d'Verteidiger hei grad so ne grosse Ateil am Dürenang im Sächzähner. Was mir a däm Matsch gfäut het, isch e Leaderfigur wo i heikle Situatione, unger angerem wenn ds Schpiu droht z'kippe, vehemänt und mit Überzügig das Rueder i d'Finger nimmt. Wenn das vom gwohnte Maa, wüu är für einisch e schlächtere Tag yzoge het, nid chunnt, hets no zäh angeri Mitschpieler uf em Platz wo Verantwortig chöi und söue übernäh. Dür dä Betriebsunfau het Büre gäge Tabäueschpitze lo abrysse. Für sich im vordere Mittufäud chönne z'behoupte, bruchts de gäge FC Diessbach/Dotzigen wieder es häuwachs Büre, wo a sich gloubt und entschprächend ou schuttet. Dä Bricht tönt zwüsche de Zyle agriffig u schpart nid mit Kritik. Derby hei mir nach em Fäuschtart i d'Meischterschaft es Büre gseh wo Fröid macht und begeischteret. Mir sy scho fasch chlei verwöhnt. Das d'Egippe a däm Matsch wird wachse, bezwiefle ig nid. Und es isch haut so, wenn muesch zueluege wie di Mannschaft drü Punkt vergyget u du nüt chasch häufe, wiegt das dopplet schwär.




Buvette

Die zwöiti Mannschaft het Büvette gmacht, und das i grossartiger Manier. Ds Menü "Bärnerplatte" isch lecker gsi und das mir so lang hei dörfe blibe, wüsse mir d'schetze. Was ig nid ganz cha gutiere isch, dass üse Gascht dr Wäg i Büvette nid gfunge het. Isch doch Büvette für Grünstern (z'Ipsach ir Büvette si mir Bürer aube die wo aus letschti Tür zuebrätsche) und Büre e wichtigi Inahmequeue und e Ort, wo me no chlei schnurre mitenang. Wenn i Zuekunft Grünstern chunnt, tüe mir de entsprächend verständlech usschiudere.


Fotogalerie


Aktuelle Beiträge

Alle ansehen

Comentarios

Obtuvo 0 de 5 estrellas.
Aún no hay calificaciones

Agrega una calificación