top of page

Es Byschu üsi Aalag!



Weme dänkt, dass dr FCB für praktisch aui Chöschte für e Betrieb und Unterhaut vo üsem Sportplatz säuber ufchunnt, muess me scho säge, dass mir uf em Lache es Byschu vor e Aalag hei und viu Lüt e Superjob mache. Scho d'Lag vo üsem Lache isch sensationell, so öppis muesch de wyt ume go sueche. Klar fäuts do und dört a Sache und Sächeli. Aber es muess ou zertscht aues finanziert wärde, respektive dr hingerscht und dr letscht muess a d'Seck, dass so Sache äbe müglech wärde.


Wenn mir nume as Aerifiziere dänke, wo me eigentlech uf jedem Sportplatz mindeschtens einisch im Johr sött mäche. Unäbeheite wärde usgliche, mi git de Wurzle wieder Platz zum schnuufe und luegt, dass sie im Bode guet verankertet sy. Die Büetz het dr FCB scho es Zytli nümme chönne lo usfüehre, wüu do e namhafte Betrag muess gstemmt wärde (meh aus CHF 15'000.00 schyns u das wäge chley Löcher u chley Sand). Wouverstande, aues us dr Vereinskasse blächet. So gseh bruchts haut chley meh Ufwand vor FCB-Syte us, für das Manko probiere uszglyche. U sy mir ehrlich, uf däm Platz lot sich sehr guet lo schutte. Öb de meh Bäu verspringe düre Platz oder dür die eigeni Unzuelänglechkeit, tüe mir nid ungersueche. Am Schluss näme mir de glych no es Bierli,. so viu isch klar.


Auso liebi Lüt, wenn eine e Sponsor het für das "Aerifiziere", de sofort am Marco Kocher alüte. Isch das nid dr Fau, tüe haut mir aui zäme luege, dass es gäng gschläcket usgseht uf üsem Lache. Das isch jo nid so schwär und choschtet nüt.



Aktuelle Beiträge

Alle ansehen