E völlig irre Matsch

FC Büren an der Aare – FC Pieterlen 7:2 (2:0)

Sportplatz Lachen, Samschtig, 5. Oktober 2019, 16:00

Dä wo das Dräibuech zu däm Matsch gschriebe het, het garantiert nid aui Tasse im Schrank gha. Es Schteizytresultat gäge ne guete Gägner, zwe nid versänkti Penautis und es Achtminutequickie vom Luca Lauper hei dä völlig düreknaut Matsch prägt.

Ufschtellig vo Büre: Simon Käser, Mischa Hofer (72. Marco Günther), Ruben Dos Santos, Eric Stauffer, Manuel Scheidegger, Luc Gutbub, Thomas Lerch (84. Yannik Tüscher), Nick Eggenberger, Reto Rüttimann (80. Men Meier), Fabian Schuler, Yannic Kubacki (56. Luca Lauper)

Ersatz: Mikael Stauffer (Ersatztorhüter)

Nid derby: Reto Grogg (2. Mannschaft), Lars Freiburghaus (Privat), David Schläfli (Privat), Diego Imperiali (verletzt), Joel Tüscher (2. Mannschaft, Siegschütze zum 1:0 in Ins), Denis Schneider (2. Mannschaft), Dario Leisi (2. Mannschaft), Raphael Schuler (Privat)

Staff: Patrick Tüscher und Patrick Von Felten (Trainer), Reto Steiner (Massör)

Gou: 18. 1:0 Luc Gutbub, 45. 2:0 Reto Rüttimann (Pass Manuel Scheidegger), 57. 3:0 Reto Rüttimann (Solo), 60. 3:1 Sandro Thierstein, 67. 3:2 Sandro Thierstein, 70. 4:2 Luca Lauper, 75. 5:2 Luca Lauper (Pass Fabian Schuler), 78. 6:2 Luca Lauper (Pass Fabian Schuler), 87. 7:2 Manuel Scheidegger (Pass Luca Lauper)

Gäubi Charte: 34. Ruben Dos Santos, 68. Luca Lauper

Bemerkige: 35. Simon Käser parriert dr Penauti vom Adem Mulaj 65. Joel Schanner verschiesst e Penauti. Klassische Hättrick Luca Lauper i 8 Minute (70., 75., 78.). Pieterlen ohni Yanick Schanner (gschperrt, zwöitbescht Torschütz vo Pieterlen)

Platzkassier: Z'Meli, d'Melanie Lerch het das wieder mit em nötige Scharm und chlei Druck grandios glöst.

Schpiiker: Louis Polverini

Vorgeplänku

Wie z'Schpiu gäge Orpund hets ou hüt wider gheisse, verlüüre verbote. Verlüürsch bisch ir Tabäue i dr ungere Häufti, gwinnsch schnupperisch a dr obere Häufti und bisch ersch mou d'Sorge vo wäge Abschtiegskampf u so los. Pieterlen, mit drü Lüt a vorderschter Front bi de Torschütze vo dere Gruppe verträte und ir Tabäue ängschte Verfouger vo Aurore isch auso e ächte Gradmässer. Chame gäge dä Gägner die gueti Leischtig vo Orpund beschtätige, oder gheit me i däm Härtetescht wider uf e Bode vor Realität zrugg? Mit dere Usgangslag isch me zwunge gsi, ds Schpiu z'mache u so dr Gägner mit de eigete Mittu z'schlo.

Retusche oder Rotation?

Gägenüber em Matsch vo Orpund hets wäge Abwäseheite im Team vo Büre Retusche gäh. A Schteu vom David Schläfli isch dr Eric Stauffer uf e Inneverteidigerposchte grückt und dr Mischa Hofer het am Eric si Platz ignoh. Wäge Diplomreis het dr Men Meier nid chönne träniere und het sich nach em ne Supermatsch in Orpund uf em Bänkli wider gfunge. A sie Schteu isch dr Nick Eggenberger zum Isatz cho. Dr Joel Tüscher, no ir Afangsformation z'Orpund, isch mit em Zwöi uf Ins und het dört z'entscheidende Gou gschosse. Dr Reto Rüttimann het si Platz ignoh und dr Fabian Schuler, z'Orpund no völlig überraschend 60 Minute uf dr Bank, isch a si Schtammplatz i d'Schpitze. Die Ufschtellig het frei interpretiert zum Ziu gha, defensiv chlei schtabiler z'schtoh und gäge Füre Druck z'erzüge, Pieterle so guet das es geit, nid i ds Schpiu lo cho. Sodali, das hätte mer ou abghandlet.

Ändlech geits los!

Es si paar Minute gschpiut, wo Pieterlen bereits dr erscht Tiefschlag muess verarbeite. Ohni gägnerischi Iwürkig het sich dr Käpten Christian Weber verletzt u het ds Schpiufäud müesse verloh. Pieterle isch zwunge gsi, sech neu z'orientiere. I der Orientierigsphase het Büre Druck erzügt und isch es paar Mou mit viu Zug gäge z'Pieterlegou zoge. Zersch pariert dr Goli vo Pieterle e Schuss vom Reto Rüttimann. Dr Fabian Schuler, im Momänt gäge Ladehemmige kämpfend, vergit us gueter Position, si Chöpfler isch z'höch agsetzt, reschpektive d'Flangge chunnt z'höch u fouglech schwär verarbeitbar. Dr Luc Gutbub versuecht sie's Glück äbefaus, schiteret aber am guete Goli vo Pieterlen. 13. Minute, dr Joel Schanner macht z'erschte Mou uf sich ufmerksam. Si Schuss wird vom ernöit glänzend ufgleite Simon Käser (dä Maa isch e Bank) i Corner glänkt. Weme de eim vo Büre mou möcht es Gou gönne, de isch das de dr Yannic Kubacki. Kämpferisch und löiferisch es Vorbiud, e Wadebiesser erschter Güte. Är kämpft sich dür d'Verteidigung düre u schteit plötzlech mueterseeleellei vor em gägnerische Goli. Si Versuech vom Torschuss misslingt. Anschtatt das dä Bau im Netz zablet, geit er übers Gou. Es isch bi ihm chlei sümtomatisch, suecht är doch chrampfhaft si erscht erfougrich Abschluss. Wenn dä Chnopf mou ufgeit, de heit de d'Hüet Giele, de chrosets de im Gebälk. Mir drücke dr Dume. Nach achtzäh Minute ändlech die verdienti Füehrig für e FCB. Dr Luc Gutbub, wie in Orpund in glänzender Schpiulune, vouschtreckt gekonnt zum 1:0. Mi wird dr Idruck nid los, dass sech dr Gägner ab dr Gangart vo de Huusherre beidruckt zeigt und Müeh het, sis Schpiu ufzzieh. Bim ne ernöite Agriff vo Büre hout me e Freischtoss use. Do si mer bim ne Punkt aglangt, wo durchus verbesserigswürdig isch, die schtehende Bäu. Es geit eifach viu zweni Gfahr us. Meischtens chöme si z'läng, z'hoch oder lande irgendwo im Chrut usse. Mänu, bisch mer nid bös, ig weiss, dass du schpöter mi eines Besseren belersch (z 2:0). Ir 24. Minute chunnt e Pass vom Yannic Kubacki perfekt uf e Chopf vom Reto Rüttimann. Einisch meh pariert dr Goli vo Pieterlen glänzend. Büre isch jitz em 2:0 nöcher, aus Pieterlen em Usglich. Chum gseit, scho waggelet d'Büreverteidigung. Dr Adem Mulaj, e träffsichere Tüp, prüeft mit em ne guet platzierte Chopfbau dr Simon Käser, dä rettet einisch meh i höchschter Not. Paar Minute schpöter schiesst dr Ruben Dos Santos e Freischtoss über ds Gou. Uf ds Gou müesse die cho Ruben! Bau hät sich die verpassti Resultatverbesserig grächt. Das Mou hautet nid dr Simu si Chaschte suber, dr Assischtänt "Pfoschte" rettet dä Schuss vom Sandro Thierstein. Es geit Schlag uf Schlag. so viu Torszene u Zwöikämpf gsehsch de nid jede Samschtig uf em Lache. U wie das bi Büre öppe Usus isch, bringt me no chlei Schpannig is Schpiu. Im ne augemeine Tohuwabohu füehrt e ungeschtümi aber notwändige Rettigsaktion vom Ruben zum ne Penauty. Wie me uf dr Foto cha gseh, parriert dr Simon Käser dä Schuss mit em ne guete Reflex und bhautet Büre im Schpiu. Paar Minute schpöter gseht dr Fabian Schuler, übrigens schpielerisch glänzend ufgleit, si Schuss vom viubeschäftigte Goli i Corner glänkt. Mir schriebe die 45. plus 1 Minute. Büre chunnt us zirka 28 Meter zum ne Freischtoss. Dr. Manuel Scheidegger zirklet dä Bau uf Füferlinie, wo dr Reto Rüttimann im zwöite Alouf zur viuumjublete 2:0 Füehrig ischiebt.

Fazit

Büre hät Glägeheit gha, relativ früeh es Pouschter z'schaffe. So isch es i de erschte füfevierzg Minute haut zu bränzlige Situazione cho, wo Pieterlen das kommende Fiasko hät i angeri Bahne chönne länke. Aber Büre darf me atteschtiere, dass e angaschierti Schpiuwies und z'Übergwicht be de usegschpiute Gouchance schlussändlech haut ou ds Zwüscheresultat widerschpieglet.

Pouse

Gäge Pouse zue, isch us dr Büvette es feins Düftli übere Lache zoge. Üsi Froue, me chönnt mi missverschtoh, wenn ig säge "üsi agehende Froue". Aber es isch äbe glich chlei so. Nöie Aalouf, auso d'Froue wo z'Büre wider wei es Dameteam uf Bei schteue, hei das Wuchenänd d'Büvette gfüehrt. Erschtens isch das e super Integrationsakt und zwöitens e sümpathischi Art druf ufmerksam zmache, dass me das gfälligscht Ärnscht meint. Mir drücke aui Düme, dass das Ungerfange glingt. No einisch zu de Düft. Feini Spaghetti u Salat hets gäh, liebenswürdig särviert. Ganz härzleche Dank liebe Froue vom agehende Dameteam.

Völlig verruckti 45 Minute!

Was jitz chunnt, chame ou in Hollywood nid besser mache. Büre schtartet besser i die zwöiti Häufti. Dr Luc Gutbub zeigt fang mou, wie präsänt är uf em Bitz schteit. Dr Schuss geit aber knapp näbem Gou düre. Paar Minute vergöh, wo dr Fabian Schuler abschliesst, dr pariert Bau landet bim Yannic Kubacki, Zäuhbars luegt aber nid use.

Luca's Wahnsinn..

Ir 56. Minute geit dr Yannic Kubacki vom Fäud u macht am Houptdarschteuer vom hütige Tag Platz. Jo, ig weiss es. Dr Houptdarschteuer schteit scho ir erschte Haubzyt uf em Platz. Aber z'Büre isch das nid so. Und dr Luca brucht aube nid so lang, dass me uf ihn ufmerksam wird. Är het si Gschicht vo däm Schpiu nach em Matsch so verzeut: "Ig bi ir 56. Minute inecho, ha zwe tiptopi Fäuhpäss abgäh, het die gäubi Charte kassiert und ha i 8 Minute drü Gou gmacht. Eigentlech hätt ig nächhär chönne go dusche".

…und Retos Wahnsinn…

Aber haut, do si no ganz angeri Sache über Bühni gange. Eis nach em angere wie z'Paris. Es louft die 57. Minute. Irgendwo nach dr Mittulinie chunnt dr Reto Rüttimann a Bau. Är schtartet zum ne Sololouf wie dr Marcel Hirscher am Hang. Es het zwar keni Slalomschtange, aber es si durchus Hindernis im Wäg gschtange. Die jitz do aus Slalomschtange z'bezeichne, wär fäu am Platz. Item dr Reto marschiert düre, schloht vor em Gou zwe Höögge und schiebt i auer Seelerueh zum 3:0 i.

…und zrugg zum Bricht

Jitz isch dä Mischt karlet. Bim ne drü zu nuu chame jo wou erwarte, dass me das Ding nümme zur Hang us git. Mir tüe fange süüferli düreschnuufe und hei es liecht atönts Lächle uf de Lippe. Es git söttigi, die hole sich grad mou es Bier, öb vor Fröid oder vor Schreck? Mi hets a de Gsichter chönne abläse! Nüme so viu, zu dene wo ine si. Die hei nämlech dr nöchscht Wahnsinn verpasst. 60. Minute Sandro Thierstein 3:1. 63. Minute Luca Lauper Gäub, d'Fäuhpäss si scho düre. 67. Minute Sandro Thierstein 3:2. Irgendwie chunnt mir die Situazion bekannt vor. Schteisch do, wie dr sicher Sieger, schteusch dr Chamme und tuesch süffisant lächle u wäg isch die ganzi Herrlechkeit. We das so wyter geit, müesse mir de näb dr guete Seeu Reto Steiner no e Kardiolog is Team näh. Hirnverruckt! Jitz si üse Gescht us Pieterle wider chlei erwachet u schnuppere Morgeluft, oder sis d'Spaghetti gsi? Jitz chunnt no ds Tüpfli uf em i, oder ds Chirsi uf dr Turte – schiesseglich was, es git wider Penauti. Wüu dr Adem Mulaj dr erscht verchauberet het, chunnt dr nöchscht träffsicher Kanditat zum Zug. Aber bi däm Zwüscheschtand u der Ufhoujagd, pfäfferet dr Joel Schanner dä Bau i Bürerhimu. Jesses Gott! Müesse mir jitz uf z'Bürebänkli glüsle, öb d'Fortuna ihres Füdle wider breit gmacht het? Was wird no us däm Schpiu? Es git ei Antwort, zwe Abschnitte wyter obe schteits, genau dr Luca Wahnsinn. 70 – 75 – 78, drü Mou Lauper, es schteit 6:2. Jitz si mir wider am Schmunzle u d'Muulegge fahre fasch zum Gsicht us. Aber was do passiert isch, loht sich Pieterlen nid lo biete. Ir 80. Minute vergit dr Joel Schanner us beschter Lag, reschpektive dr Simon Käser pariert suverän. Es isch Zyt, eine wo bim Blick d'Note 6 übercho hät, dr Reto Rüttimann geit unger verdientem Applous richtig Garderobe. Wahnsinn, was dä i sim Auter (40) ablieferet. Das giut ou für e Manuel Scheidegger (33) und für e Thomas Lerch (39). Ersetzt wird är düre Men Meier. Churz druf abe zieht ou dr Thomas Lerch si verdient Fürobe i, dr Yannik Tüscher ersetzt ne. Ir 87. Minute wird ou am Manuel Scheidegger si Leischtig no krönt. Igsetzt vom Luca Lauper verwandlet är suverän zum Schlussresultat.

Schlusskommentar

Dä Sieg vo Büre katapultiert üsi Manne uf e füft Platz, sächs Punkt hinger em souveräne (usser gäge Büre) Aurore u zwöi Punkt hinger de immer no überraschende Diessbach/Dotzigen.

Mir hei dörfe es verruckts Schpiu erläbe. Viu Torszene u Zwöikämpf hei's zum ne Läckerbisse lo wärde. Es isch bi beidne Mannschafte um viu gange u trotzdäm isch es über 90 Minute es fairs Schpiu blibe.Erwähne darf me sicher ou e Topleischtig vom Schiedsrichter, wo nie Gfahr glüffe isch, ds Schpiu zu de Finger us verlüre.

FC Pieterlen

So müesst's eigentlech immer sy, wie das Pieterlen vorbiudlech zelebriert het. Gschlosse si sie i dr Büvette aazträffe gsi u si fei chlei lang bliibe. Merc "Lions" für e sehr sümpathische Uftritt in Büre. U sorry, dass dr Bär hüt sini Chraue besser igsetzt het, aus dir öii Tatze. Viu Glück für die räschtleche Schpiu.

Em verletzte Schpieler Christian Weber wünsche mir schnäui u gueti Besserig. Hoffentlich isch d'Verletzig nid so schlimm, wie's usgseh het!

Dr nöchscht Matsch isch uf em Mühlefeld in Biu gäge FC Madretsch. Sunntig, 13.10.2019, Apfiff isch am 10:30.

Hopp FCB