Hät der Hung nid gschisse, hät är dr Haas verwütscht.
Öppe so chame das abverheite, negative Startfurioso vo Müntschemier umschriebe. Hät me die X Chance verwärtet und wär me mit de Närve chlei hushäuterischer umgange u hät dr Schiri dä Eufer gha – wär weiss – vermuetlech wär dr Schtart nid aus Rohrkrepierer gändet, oder bliebe mir bim Schie…, gopfriedschtutz grad id'Hose gange.
E Blick uf die aktuelli Ranglischte zeigt (für wider zum Hung zruggzcho), dass wenn Müntschemier… de äbe nid i so ne Louf inecho wär, im Gägeteil, dr FCB vo däm Momänt a z'Chrottehoor hät im Sack gha. Aus Radnotiz muess no erwähnt wärde, dass Büre näbe 2 Punkt, dr Reto Rüttimann (roti Charte), dr Träner a dr Linie (är het sech nümme chönne iränke) und e chlei "z'comme il faut" verlore het. Ir Ranglischte vom "Dernäbebenäh" het me suverän d'Schpitze übernoh. Hoffentlech wird de schpöter die Hypothek nid zum Ylueger?
Verlöh mer die Schpekulatione u luege zrugg, wie d'Mannschaft und dr Schtab dä Foopa wäggschteckt hei. E Wuche schpöter isch Wileroutige grad rächt cho. Aber so bluetläär u sackschwach muesch nid uf em Lache wöue cho Punkte, mit ere 7:0 Packig si sie absärviert worde u no bluetläärer wider i d'Pampa zrugggreist. Do isch jo e Schteigerig fasch nümme müglech, het mänge z'Gfüeu gha. Denkste – uswärts z'Ägerte isch Kanone wider glade gsi u mi het nün Chischte montiert. D'Rehabilitation isch wahrlech glunge. Wär cha jitz üs no brämse? Het me sech ächt nach dene Höhflüg die Frog gschteut? Uf au Fäu isch d'Ernüechterig schnäuer itroffe, aus me das gloubt hät. Wider so sinnlos Punkt verchauberet. Ins, gäng chlei e Angschtgägner (derbi het me jo verwandschfaftlichi Beziehige, wöme villech mou chlei chönnt lo schpiele, gäu Thömu), het du Büre vom hööche Ross obenabeghout und dr Obsitrend gschtoppet. Das 2:2 gäge Besa in Biu drufabe het zur augemeine Erheiterig ou nid grad viu bigschtüüret. Mit siebe Punkt us füf Schpiu isch me bereits acht Punkt hinger em Erschte. U wär isch das ächt? Jo genau, Müntschemier, dä mit em Hung. Do muesch de jufle wie ein Schweinderl, wenn de vordran (a dr Schpitze) wieder wotsch go schmöcke. Mache mer e chlini Pouse, nach dene Hiobsbotschafte müesse mir e chlei zur Bsinnig cho. Chopf zum Fänschter us, es paar mou chräftig i- und usschnuufe.
So, jitz geits besser! Das hei äuä üsi Kräcks ou dänkt u gmacht, wüu jitz chunnts fuschtdick und e Serie wo sech gwäsche het. Sächs Schpiu, achtzä Punkt und es Gouverhäutnis vo 26:9. Ungloublech, do geit der dr Schuss ab. Doch wider go schmöcke! Vore a dr Schpitze! Füf Punkt Rückschtand, u Müntschemier chunnt de no uf Büre u z'Chrottehoor hei dr Pädu (Tüscher, Träner) u dr Vofi (Patrick von Felten, Träner) no im Sack. Figgi u Müli für d'Rückrunde? Mi muess es haut säuber i d'Häng näh, schüsch chas de disewäg oder äiwääg usecho. Eifach dä mit em "comme il faut" wär de huere wichtig. D'Schicksau i die eigene Händ näh, seit me däm.
Luege mer no, was i dene sächs Schpiu passiert isch. Uf em Lache hei si dr Tritt gäge Iberico wider gfunge u mit Wiuenschraft emänd 5:2 gwunne. Z'Töiffele hets Närve brucht, bis me ou dört mit 5:3 het chönne drü Punkt a z'Trochene bringe. Längnou, es Lokalderby unter bsundere Vorzeiche, het ghaute was me sech dervo verschproche het. E affegeili Mannschaftsleischtig und z'kämpferische Plus si entscheidendi Faktore gsi, dass üsi Gieli mit 3:0 aus verdienti Sieger vom Platz schtouziert si (dr Applous vom Publikum hei si verdient gha und dämentsprächend gnosse). Ou do, aus igfleischte Bürefan het z'Närvekostüm etlechi Strapaze müesse überschtoh, bis ab dr 69. Minute z'erschte Gou die ersehnti Erlösig brocht het (Schlussresultat 3:0). Am Uswärtsschpiu in Port het me sech nid lo lumpe u die Sach vo Afang bis am Änd im Griff gha. Obwou, im Vorfäud vom Schpiu isch no chlei Hektik ufcho. Z'wichtigschte Utensil vom Schütteler, nenei nid z'Hirni (isch im Fau e Witz) - d'Schuttschue, si eim Aktör dür unghobleti Suwenierjäger klauet worde (do gsehsch de gschisse us), u z'Bänkli isch mit agschlagne Lüt, fasch nume u feim Scheiche, eher mutz bsetzt gsi. Der Nächste bitte. Radelfingen! 3:1! Furtputzt! Sydefyn! Gäge Grüenstärn het mes de wieder e chlei lo schlyffe. Logisch, ligsch zwöi zu null i Füerig, überchunsch dr Aschlussträffer, zeigsch aber de Grössi, u machsch es i de Schlussminute klar, z'Verdikt zugunschte vom FCB 4:1. D'Schlussbuggee vor e wahrlich gfröite Serie!
Die Wuche het wider z'Träning agfange. Das heisst adiö kulinarischi Höheflüg vo de Feschttäg, adiö güügele über Fasnacht. Jitz heisst z'Motto "Fifi attack" oder "Müntschemier, es isch agrichtet". I däm Sinn näht dr Finger…, dir wüsst scho – u lueget, dass dä Marsch a d'Schpitze e Fortsetzig gfingt. Viu Glück, mir si derby!
No es Wort zum Tränergschpann. Dr Pädu u dr Vofi mache e Supertschop. Sie heis verschtange, jungi Schpieler hungrig z'mache u z'integriere, die Arrivierte z'ermuntere Verantwortig z'übernäh u die äutere Schpieler izschpanne, mit am Chare z'schriesse. Nid z'vergässe d'Nöizuezüg, wo sech mönschlech u sportlech nahtlos integriert hei und us dr Mannschaft nümme wägzdänke si. So isch e Mannschaft gwachse, wo harmoniert, dür ne Superkollegschaft überzügt u wider Fröid am schutte zeigt. Und – und das isch ou wichtig - nach em Matsch bim ene Schluck z'Zämesii pflegt u nid grad i aui Himmusrichtige verduftet.
Mir fröie üs uf ne schpannendi und hoffentlech erfougriche Rückrunde.
Wichtigi Termine: 9. März, 15.00 Uhr: FCB - FC Pieterlen (Träningsschpiu) 16. März, 16:00 Uhr: FCB - SV Lyss 3. Liga (Träningsschpiu) 30. März, 16:00 Uhr: FCB – FC Müntschemier (Schtart Rückrundi)
Comments