top of page

Du ghörsch jo ds Gras wachse!



Syt mitti Apriu 2021 bi ig jitz scho Platzwart uf em "Lachen". E turbulänti Zyt mit lehre, erfahre, abwäge, beurteile, lyde, gschpüre, hadere und hoffe.


Ig ha gwüsst, dass das e Chnochetschob isch, wenn me sy Büez rächt wot mache. Ig ha ou gwüsst, dass ig viu muess lehre und viu muess lose. Es truurigs Ereignis isch mir uf däm Wäg e grossi Hiuf gsy. Ds Hochwasser vom Juli/Ouguscht und die damit verbundeni Sanierig het mir scho viu mit uf e Wäg gäh und es Verschtändnis für Rase und die entschprächendi Pfleg glehrt. Mit Rat und Tat sy mir d'Firma Aemmer AG in Lyss (Sportplatzbou) und vom Düngerlieferant, dr UFA, by Froge zur Syte gschtange. Säubschtverständlech het ou dr Marco Kocher sys Wüsse wytergäh. Aber viu het me ou säuber müesse merke, oder isch vo Bure, wo me mit ne is Gschpräch cho isch, dörfe erfahre. Aber e Siebesiech bisch wäge däm no lang nid. Im Internet ha ig my schlau gmacht, sytelängi Dokumentatione abeglade, über Nacht ungers Chopfchüssi gsteckt und am angere Tag e Hampfele Wüsse mit uf e Lachen gnoh.


Mängisch isch vo usse dr Ufwand und z'Ergäbnis nid abschetzbar und Arbeite wo me gmacht het nid offesichtlich sichtbar. Das sy Momänte, wo dr Platz eigentlech sy Rueh würd bruche (Regeneration), bsunders ou wüu ds Programm vor Rückrunde nume es chlyses Zytfänschter zur Regeneration zuelot. Y dene Zyte isch me aus Platzwart sensibu und probiert z'versueche, freizytlechy Tätigkeite uf e Trainingsplatz z'verlege. Logisch, dass das y fautsch Haus cha cho und unbegrieflech erschient. Aber das allei z'flicke vom Houptfäud nach em ne Matschwuchenänd öppe e haube Tag y Aaschpruch nimmt, gseht ou niemer (nächhär sy de immer no nid aui Löcher zue).


Rückwirkend zieh ig vor aune, usdrücklich vor aune Platzwarte vor vergangener Zyt dr Huet. Das muess me nid nume gärn wöue mache, mi muess es ou denn mache und richtig mache, wenn's eim äbe de grad nid passt. Villech wot jo d'Frou chley go loufe oder ychoufe, eis go schnappe, machsch nid mit isch dr Huussäge schief. D'Ching gränne für y Europapark oder mache eim schüsch schiessig. Es wär schön Wätter, ab uf e Töff oder ds Cabriolet wieder mou fürenäh, oder d'Schwiegermueter wird achtzgi, u verreckt dr Küre und d'Frieda chöme z'Bsuech, dr Hung het Ranzeweh und muess zum Tierarzt, d'Giele wey cho brätle, oder dr Tüfu chunnt uf de Schtäuze. Das geit haut de villech nid! Jä warum de nid? Wüu dr Rase wachst wenn är wott, d'Pfleg usschliesslech by guete Wätterbedingige chöi usgfüehrt wärde und d'Mätsch nid dr Platzwart aasetzt. Mähje und unger Umschtände no ufnäh, zeichne und d'Maschine und Grätschafte putze und pflege. A dr Umgäbig isch de no nüt gmacht! Schnäu sy X Schtund verby.


Wehe dr Rase isch chley z'höch, ds Bord nid gmähit, d'Fahne nid dobe, d'Löcher uf em Bitz nid zue, es Papierli am Bode, e Zigaretteschtummu im Rase, Snus-Briefli liege dasume, d'Schpielerbänk nid pflegt, dr Trainingsplatz z'troche, dr Vorplatz vom Bauhüsli nid gwüscht, Gjät am Schpiufäudrand vom Houptfäud, ds Bauhüsli gseht dry wie nach em ne Bombeyschlag, d'Trainingsliebli liege chrüz und quer umenang, d'Matschbäu hey mou zviu Luft um de nächhär zweni Luft z'ha, Gehwäge sy dräckig, d'Gou sy nid verrumt oder nume so lala, z'Gras wachst über d'Sitzbänkli uf em Damm, d'Ghüderchüble sy vou, s'Gjät glüslet zwüsche de Platte ufe, d'Wärbetafele sy schmutzig, überau wucheret ds Gjät das es dätsch u chlepft, jitz geit mir dr Schnuuf us. Und übrigens ha ig gar nümme Zyt do Sätz z'brünzle, ig muess uf e Schuttplatz, ds Gras wachst und nächhär geits wyter by "Wehe dr Rase isch chley ...


Erschienen im Matchprogramm vom 7. Mai 2022 FCB - FC La Neuveville-Lamboing


Aktuelle Beiträge

Alle ansehen

コメント

5つ星のうち0と評価されています。
まだ評価がありません

評価を追加