top of page

Dr Start isch glückt (Matchbrichtli)

FC Büren an der Aare – SC Aegerten Brügg 3:1 (1:0 )

Sportplatz Lachen Büren an der Aare, 16.08.2020, 14:00 Uhr

Meisterschaft 3. Liga, Gruppe 6




Ufstellig: Stauffer Mikael, Gutbub Luc, Schneider Denis, Schläfli David, Scheidegger Manuel, Lerch Thomas (C) (70. Eggenberger Nick), Meier Men, Kubacki Yannic (80. Hofer Mischa), Schuler Fabian, Rüttimann Reto, Lauper Luca (60. Tüscher Joel)


Ersatz: Sutter Michael (Ersatztorhüter), Hut ab für dä Isatz, geile Tüp!


Trainer: Rüttimann Reto, Von Felten Patrick


Abwäsend: Bigler Manuel (2. Mannschaft), Grogg Reto (abwäsend), Günther Marco (verletzt), Imperiali Diego (2.), Käser Simon (verletzt), Leisi Dario (2.), Stauffer Eric (verletzt), Dos Santos Ruben (gschperrt)


Gou: 45'+1' 1:0 Schuler Fabian nach Doppupass mit Rüttimann Reto 80' 2:0 Rüttimann Reto (Penauti, nach Foul an Kubacki Yannic) 90'+3' 2:1 Sunntigsschuss is Filet vom Nico Thomet 90'+4' 3:1 Hofer Mischa uf Pass vom Schuler Fabian


Gäubi Charte: 25' Lerch Thomas, 35' Kubacki Yannic


Bemerkige: Dr Schriberling nid uf em Lache azträffe, e Kontakt über zwe Husegge mit ere positiv testete Person isch no unklärt gsi u so bin ig freiwiuig i d'Quarantäne. Fründlecherwiis het dr Reto Rüttimann mi ufdatiert, dass doch no es paar Wort hei chönne brösmelet wärde. Danke für ds Verständnis.


Was Sach isch: Nach 281 Tag oder 9 Monet u 7 Tag ändlech wieder es Meisterschaftsspiu uf em Sportplatz Lache. Ds Letschte isch das gäge Evilard gsi (9. Novämber 2019), wo Büre suverän 4:2 gwunne und dr dritt Tabäueplatz het chönne zementiere. Wo im Februar 2020 die erschte Coronafäu i üsem Land bekannt worde si, isch e rasanti Entwicklig nümme ufzhaute gsi. Bereits am 13. März si Veranstautige mit meh aus 100 Persone verbote worde, glichbedütend mit em Abbruch vor Fuessbaumeisterschaft.


Hüt stöh mir jo nume chlei besser do, aber schutte chame wieder, haut mit de notwändige Vorsichtsmassnahme aus Ruckseckli. Das näh mir aber gärn i Chouf und haute üs strikt dra.

Meisterschaftsuftakt: Dr Meisterschaftsstart i dr Saison 2019/2020 isch mit drei Niederlage nume harzig glunge. Umso meh isch me nach de dürzogene Fründschaftsspiu und em verkorkste Cöpspiu gäge d'Adler vo Shqiponja gspannt gsi, was für Choscht uf em Lache särviert wird. Liechti Skepsis und e spürbari Unrueh unger de Igfleischte het lo vermuete, dass sich d'Mannschaft d'Vorschusslorbeere zersch muess verdiene, u das trotz dr usgezeichnete Vorrundi vo dr abbrochne Saison.


Üsi Giele hei de Skeptiker uf em Platz die richtigi Antwort gäh. Apropos Skeptiker, ou ig ha d'Wichtigkeit vo de Träningsspiu vermuetlech chlei z'höch igstueft und mi vom "zu Nuu" im Cöp z'negativ lo beiflusse u liecht Närveflattere vor däm Start übercho.


Nach Ussag vom Träner Reto Rüttimann isch d'Egippe um Rüttimann/Von Felten hüt sehr diszipliniert as Wärch gange, guet gstande und het kämpferisch mit ere gsunde Istellig operiert. Am guete Gägner Aegerten Brügg het me weni zuegloh und vor em eigete Sächzähner rigoros ufgrumt. Brilliert het dr Mikael Stauffer bim Stand vo 0:0, wo är mit ere mirakulöse Abwehr dr FCB im Spiu bhaute het. U öppis fröit mi pärsönlich am meischte, mi breicht wieder die Chischte, und um das geit's jo schliesslech. Bravo Giele, gratuliere!


E Troumstart! Genau das hets brucht, für e chlei Rueh i d'Umgäbig z'bringe, d'Wallige z'bekämpfe und Diskussione i n'es ruhigers Fahrwasser z'bringe. Aber de öppe gar no nid e Grund scho in Euphorie z'mache oder gar düre z'dräje, es het ersch agfange, guet agfange.


Nöchscht Sunntig geits de is Längfäud gäge CS Lecce. Lecce? Jäjoo, das isch dört mit em Schnägg. Nei nid das was du dänksch, dr Schnägg für i Ticketoutomat vom Parking. Mir si dört jo scho ir Grossstadt und dört geits angers zue. U das Johr löh mir üs nid lo lumpe, die Pünkt nämer de gfälligscht mit hei, schüsch dräje mir de düre u chnüble dä Schnägg wieder use!


Hopp FCB und viu Glück!


Übrigens - Komplimänt a die beide Trainer - Superjob!



Aktuelle Beiträge

Alle ansehen

Comments

Rated 0 out of 5 stars.
No ratings yet

Add a rating