1. Oktober 2021 Dr Schrieberling isch nach de Ferie zrugg
Wenn sich eine vergnüegt, mi cha ou säge für einisch i d'Ferie geit, müesse anderi lyde, d'Houmpäitsch vom FCB blybt schtumm, keni Nöiigkeite, keni Informatione u keni Biudli. Ds Chlumperisiko lot lo grüesse.
Aber jitz isch Schluss. Fertig mit gniesse vo kroatische Spezialiäte u Seafood, schwümme und töichle im Pool oder im Meer sy Wunschtröum, summerlechi Temperature sy passé, es feins Schlückli Wy oder es Karlovatschko (bärndütsch) isch verpönt u schpät is Näscht geit scho gar nid.
Aacho im Autagstrott seit me däm. Blööterliwasser statt edle Wy, es Salätli oder es soutüürs und säutenes Egli vilech no importiert a Schteu vo Meeresviecher, sünnele und plantsche müesse am nüchterne dusche wyche und am Morge heissts Finger use näh u Gas gäh. Das sy Ussichte!
Sit üsem letschte Bricht isch fei chley Zyt vergange u d'Meischterschaft het so richtig Fahrt ufgno. We me vor Saisonschtart d'Gruppe agluegt het, het me vom Schiff us gseh, dass das Unternähme so sini Knackpünkt wird ha. Befürchtig isch ufcho, e Zwöiklassegseuschaft chönnt die Gruppe präge. So schlimm isch es du aber nid cho.
Bevor mir wyterfahre, schnäu e Blick uf die aktuelli Ranglischte.
3. Liga - Gruppe 4
Berauschend isch angers - aber haut, süüferli dryschiesse! Uf Grund vo de Hochwasserschäde uf em Lache, aui Vorrundespiu müesse uswärts ustreit wärde, und de ygschränkte Trainingsmüglechkeite chöi mir e z'friedne Gring mache. Was aber wieder einisch meh uffaut und bim eint oder angere es Chopfschüttle uslöst, sy die verd..... Schtrofpunkt. Gäbs Pieterle nid, wär dr FCB do einisch meh a dr Schpitze aazträffe. Mir sy doch nid so es hitzigs Vouk, dass mir üs ab jedem Seich d'Schyssdräck müesse ufrege, oder jedes und aues mit em ne Kommentar muess gschmückt wärde. Nid echauffiere, sech calmiere oder wie me hüt seit chille. Chille Giele, de isch me de villech änds Johr nid wäge de Schtrafpünkt uf em Schlöidersitz. Nützt äuä glych nüt, wyterfahre.
Ig, aus sogenannte Berichterstatter, by jo bis jitz wäge wichtige Arbeite uf em Schuttplatz und Ferieabwäseheite nume a eim Spiu präsänt gsy. Das isch e Schand, ig gib es zue. Büre isch in Schüpfe mit ere unnötige Niederlag (4:2) gschtartet. My het dr Aaschyn übercho, dass do no nid so viu zäme passt het. Schad isch eifach, dass me gäge e schwache Gägner nid het chönne es Punkt userangge. Im zwöite Spiu gäge Orpund het me sech 0:0 trennt und z'erschte Pünktli ygfreeset. Gäge Orpund wo mittlerwyle Gas git e gueti Usbütti. Was isch mit Pieterle los? E 3:0 Sieg für üsi Manne gäge es Team wo i dere Vorrunde dr Idruck hinterlot, vo aune guete Geischter verlasse z'sy. Vo Zollikofe het me dr Heiwäg mit em ne beachtliche Punkt chönne ungers Füdle näh, e positivi Überraschig. Gäge souverän Leader Lamboing-La Neuveville füehrt dr FCB bis y die 82. Minute mit 2:1, het sich aber schyns völlig unglücklech no dr Anke vom Brot lo wägschläcke. Die 3:2 Niederlag isch bitter, aber ds Glück gheit de irgend einisch wieder uf die angeri Syte. Nach Ussage vo ygfleischte FCB-Fans und Fuessbausachverständige isch dr Punkt in Längnau für üse FCB glücklech z'schtang cho. Chame das überhoupt säge, wenn me y dr 95. Minute no dr Usglych überchunnt? Item – zwe Penauti vom Luca Lauper hei für dä wichtig Punktgwinn gsorget.
Hüt am Obe geits in Aegerten wyter. Am haubi Achti schtiegt das Spiu. Büre het wäge Ferie namhafti Absänze. Dr Luc Gutbub und dr Dario Leisi hei ds Göfferli packt. Dr Joel Tüscher und dr Fabian Schueler plangge dr Ranze a dr Adria und dr Luca Lauper, Torschützeleader bim FCB, het sich im Training verletzt. Ds Eis wird mit vier Schpieler vom Zwöi verstercht. Schöni Ussichte, nid wäge dene vom Zwöi, nei, Punkt gäge Aegerte wäre enorm wichtig.
Wäge däm ersch rächt – hopp FCB!
Comments