Eigentlech isch dr Simu e Bürer, aber ganz korräkt isch är äbe e Meierieder. Aber eis isch de sunneklar, dr Simu schuttet sit Mönschegedänke ds Büre. Am 18. Dezämber 1985 isch dr Simu ds Illanz (!) uf d'Wäut cho und Mitti 1987 uf Meieried züglet. Lut Homepage "eine politisch eigenständige Kleinstgemeinde mit 53 Einwohnern und einer Fläche von 63 ha". Aui Schuele (Prim und Sek.) het är zwangswys in Büre bsuecht, und d'Matur in Biel absolviert. Aus Computerfreak isch nume logisch gsy, dass är bir Raptus AG (e Informatikbude) in Lyss Unterschlupf gfunge het. Bruefsbegleitend het ds Informatikstudium e wytere logische Schritt y sim Bruefsläbe bedütet. Hüt schaffet dr Simu aus Software-Entwickler immer no ir glyche Firma, die tröii Seu.

 

Mittlerwyle isch dr Simu mit dr Sarah verhürotet und beide hei zwöi Töchtere, d' Neah Malou (9) und Mailin Louise (6). Är isch chley ruhiger worde, trinkt aber gäng no gärn Bier, lost gärn Rock und zum Ässe seit är, "das ist schon mal grundsätzlich gut". By de Hobbys chunnt wie us dr Pischtole gschosse Familie, Fuessbau und Heimwerken. Dä vo Heimwerken ha ig mir gmerkt Simu! Dr Simu isch jo prinzipiell e liebe Cheib, aber dä cha de eim ou uf Paume (Palme) bringe. Sy Rueh – mängisch fasch nid zum ushaute. Das isch ihm aus Gooli aber scho es paar Mou z'guet cho. Verzwiefelt sy sie, die Schtürmer. Aus Schwächi git är aa, "Luft nach oben bei der Trainingspräsenz". Het är das auso ou scho säuber gmerkt. Super, das isch e guete Aasatz uf em Wäg zur Besserig.

​

A Büre liebt är z'familiäre Umfäud, die gröschti chlyni Fröid im Autag isch es chüehs Bier mit de Mitspieler uf em Lachen nach em ne Sieg. Do schtöh mir aui zu dir.

 

Mit 37gi isch e Gooli uf em Höhepunkt vo sir Karriere. Mi isch aber ou aafäuiger, darum isch dr Simu zur Zyt verletzt und ds Team und sy Kolleg Mikael Stauffer warte geduudig uf sy Rückkehr. Was ich schon lange sagen wollte, do schrybt är, dr Liverpool-Fan, Hopp Büre! Passt wunderbar, gueti Besserig Simu!

​

Erschienen im Matchprogramm vom 30. April 2022