Dr Günä, oder Marco Günther wie är mit bürgerlichem Name heisst, isch e Bärner-Giu. Über e SC Ittigen, BSC YB und FC Breitenrain (whow, was für Näme) het dr Marco, zäme mit em Fabian Schuler, im 2018 dr Wäg uf Büre gfunge. Aus Wassermaa am 22.01.1998 uf d'Wäut cho isch dr Günä hüt 177 cm gross und mit 73 Kilo eher e athletische und wändige Schpielertyp. Das är es grosses Kämpferhärz het, git me ihm nid unbedingt. Mi merkt's de ersch, weme gäge ihn schpiut, bickuhert und unerbittlech. Yr Mannschaft schpiut är überau wo Not am Maa isch, d'Wunschposition vom blauöigige Muurer isch d'Inneverteidigung. Zur Zyt isch är dür ne Bänderriss usser Gfächt.

 

Rahmschnitzu und Nudle u nid es Glas feine Rote drzue, nei es Rivella, und us em Lutschprächer HipHop u de isch är nümme aasprächbar. D'Hobbys sy Fründe träffe und natürlech Fuessbau. Logisch isch är YB-Fan u dr Ex-YBler Gürkan Sermeter sy Lieblingsschpieler, das cha nid angers sy. Sterchi sy die gfürchtete Grätsche und d'Schwechi d'Chrämpf, die chöme vom Rahmschnitzu, Günä Ernährig umschteue!

 

Ufpasse Modis u Giele, jitz chunnt's. Powernap, nid eifach chley pfuuse, nei Powernap (Mittagsschlof) isch sy chlyni Fröid vom Autag. Und was är scho lang het wöue säge "Hie z'Büre sy eifach aues geili Sieche!" Dr Zämehaut z'Büre, dä maa är bsunders. Mir näh das gärn so entgäge, merci!

 

Mir hei am Aafang gseit, Wassermaa isch dr Günä. Ussergwöhnlech sy die, mängisch skurril. Är cha sys Umfäud verblüffe. Är isch e wahre und guete Fründ und sehnt sich nach Freiruum und Unabhängigkeit. Um ihn ume wird’s nie längwielig. Kreativ, spirituell und charmant– schwär z'gryffe u mängisch rebellisch, kühl. Ussergwöhnlech äbe!

 

Du hesch y dr Wurmbüchse grad no gfäut, geile Cheib Günä, Supertransfer Fäbu!

​

Erschienen im Matchprogramm vom 11. Juni 2022

​